“Kico Nos ta Come?” Un encuesta combina cu un estudio kimico riba nos alimentacion diario

ORANJESTAD- Entre 24 di maart cu 30 juni 2025 Departamento di Salud Publico den colaboracion cu IBISA, CBS y WEB Aruba N.V. lo bay cuminsa cu un Total Diet Study (TDS) cu ta un estudio total, cienifico pa por haya informacion di nos comunidad riba producto y alimentonan mas consumi na Aruba. 

E studio aki ta consisti di 2 parti:

  1. Un encuesta di kico nos ta come;
  2. un estudio di laboratorio pa e parti kimico.

Despues di e encuesta, pa medio di un investigacion kimico ehecuta pa WEB Aruba N.V. lo saca afo composicion di nos alimentonan mas consumi pa sa na cua substancia of materialnan nos ta exponi door di nos alimento y haya sa si esakinan tin relacion cu malesanan cronico manera cancer, diabetes y obesidad.

Pa cu e encuesta aki a  selecciona 500 adres pa Oficina Central di Estadistica (CBS), reparti rond di ful Aruba. E 500 adresnan selecciona lo bay ricibi un carta den nan postbus cu e invitacion pa participa na e investigacion “Kico Nos Ta Come?”. Den e dianan siguiente un encuestador lo pasa na e cas pa selecciona un persona den e cas pa participa, na e encuesta aki por participa solamente ciudadanonan di 18 aña pariba y tur dato ta keda anonimo. 

E implementacion di e TDS ta importante pa diferente motibo:

  1. E estudio ta hunga un rol crucial pa locual ta safety di nos cuminda. Door di investiga sistematicamente ki substancia nos ta ingeri door di nos alimento, nos por identifica e riesgo na tempo y ahusta e maneho. 
  2. Ademas, e estudio ta duna informacion valioso pa esnan cu ta responsabel pa desaroya maneho y pa e industria di alimento. E resultadonan ta yuda pa tuma decisionnan informa tocante seguridad di nos alimento, y nan produccion. 
  3. E tin influencia riba educacion di e consumidor. Door di duna informacion tocante lo cual realmente tin den nos cuminda, nos por tuma decisionnan  mas informa y ta mas consciente pa locual ta nos salud y bienestar.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.

Encuesta "Kico bo ta come?"