Invitacion pa participa na “Kico nos ta come” a sali

ORANJESTAD - Entrante 14 di maart e prome invitacionnan pa participa na e investigacion “Kico nos ta come” lo cuminsa yega e diferente hogarnan na Aruba. Entre 24 di maart te cu 30 di juni 2025, Departamento di Salud Publico (DVG) den colaboracion cu IBISA, CBS y WEB Aruba N.V. lo ta haciendo un Total Diet Study (TDS) cu ta un estudio total, cientifico pa por haya informacion di nos comunidad riba producto y alimentonan mas consumi na Aruba y analisa e resultado di esaki cu malesanan cronico manera diabetes, presion halto y obesidad.

Pa cu e encuesta aki CBS a selecta 500 adres, reparti rond di ful Aruba. E 500 adresnan selecciona lo bay ricibi un carta den nan postbus cu e invitacion pa participa na e investigacion “Kico Nos Ta Come?”. Den e dianan cu ta sigui un encuestado lo pasa na e casnan cu a haya e invitacion pa selecciona den e cas un persona pa participa. Na e encuesta aki por participa solamente ciudanonan cuminsando for di 18 aña bay ariba y tur datos ta keda anonimo.

E studio aki ta consisti di 2 parti:

  • Un survey (pregunta) di kico nos ta come. E encuestado lo pasa na e cas na 2 ocasion pa haci diferente pregunta.
  • Un estudio di laboratorio pa e parti quimico. A base di resultadonan di e survey “Kico nos ta come” WEB Aruba N.V. lo haci investigacion riba e productonan mas uza y consumi.

E implementacion di e TDS ta importante pa diferente motibo:

  1. Siguridad di nos cuminda. Door di investiga sistematicamente ki substancia nos ta ingeri door di nos alimento, nos por identifica e riesgo na tempo y ahusta maneho.
  2. Desaroya maneho y produccion alimenticio. E estudio ta duna informacion valioso pa esnan cu ta responsable pa desaroya maneho y pa e industria di alimento. E resultadonan ta yuda pa tuma decisionnan informa tocante siguridad di nos alimento, y nan produccion.
  3. Conscientisacion di comunidad. Door di duna informacion tocante locual realmente tin den nos cuminda, nos por tuma decisionnan mas informa y consciente pa locual ta nos salud y bienestar.

Pa mas informacion:

Like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na mailto:servicio@dvg.aw

Invitacion pa participa na “Kico nos ta come” a sali.