Entrega di Registro di Personal 2024

ORANJESTAD – Departamento di Labor y Investigacion (DAO) ta informa cu e periodo di entrega di Registro di Personal 2024 pa tur empresa na Aruba lo ta di 5 februari 2025 te cu 16 april 2025. 

E Ordenansa Laboral 2013 (Arbeidsverordening 2013, AB 2013 no. 14) ta vigente desde 1 di april 2013. A base di articulo 28 y articulo 30 di e Ordenansa Laboral 2013 tur compania ta obliga di ta tin un Lista Laboral (Arbeidslijst) y un Registro di Personal (Personeelsregister). E implementacion di articulo 28 y articulo 30 di e Ordenansa Laboral 2013 ta regla den e Decreto Nacional Registronan di Ordenansa Laboral 2013. E modelo di e Lista Laboral y Registro di Personal ta regla den e Decreto Nacional menciona anterior y ta obliga e dunado di trabou pa entrega e Registro di Personal na Director di Departamento di Labor & Investigacion (DAO).

Den e formulario di e Registro di Personal 2024 (model 1A) ta indica e cantidad di personal registra den 2024. Den e formulario (consistiendo di dos parti) di e Personeelsbehoefte (Manpower Planning) 2025 ta identifica e necesidad pa personal pa e aña venidero (Modelo 1B) y e necesidad di personal pa cada proyecto specifico den 2025 (Modelo 1C), manera indica den Modelo 1B.

Desde aña pasa DAO a introduci un metodo nobo di entrega di e documentonan aki cerca DAO. E metodo nobo aki ta encera pa companianan, a traves di un portal cu su mesun login, haya acceso na e database di DAO (LABORA) unda cu por entrega/suministra e datonan di e Registro di Personal y di e Manpower Planning. Aki e compania por haya acceso na nan datonan na cualkier momento. Si bo ta desea pa participa den e metodo nobo aki por manda un email pa Sr. Simon Brete (simon.brete@aruba.gov.aw).

Registro di Personal 2024 

E unico forma cu por entrega e Registro di Personal ta den e forma digital. Si bo no tin acceso ainda na e database di DAO (LABORA) (segun metodo nobo di entrega), por download e formularionan digital:

Of por haci un peticion via e-mail na aanvraagpr@gmail.com y DAO lo mail bo e dos Excelsheet. Nos ta pidi pa lesa e splicacion atentamente momento cu ta bay yena e Excelsheet. Tambe ta haci un peticion pa momento cu ta yena e informacion pa verifica cuidadosamente e detayenan di e empleo pa asina sigura cu esaki ta coresponde cu bo administracion y e payslip. 

Unda y con por entrega e Registro di Personal 2024 

DAO ta haci un peticion pa hinca e datonan den e formulario digital, segun e modelo stipula pa ley, y pa manda nos esaki na e-mailadres arbeidsmarktaruba@gmail.com. 
Den caso cu bo compania tin un of mas sucursal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. KvK-nummer 5555.0) pero tambe pa cada sucursal (p.e. KvK-nummer 5555.1, 5555.2 etc.). Ta pidi tambe pa indica cua trahadonan ta rouleer door di pone un strea (*) den kolom patras di e kolom “No.” ariba e formulario digital.

DAO ta informa cu ta obligatorio pa yena e Registro di Personal. 
DAO lo mandabo via e-mail un comprobante cu a ricibi e formulario di Registro di Personal 2024. Tene cuenta cu e comprobante di entrega no ta implica aprobacion di e Registro di Personal 2024. DAO lo duna durante aña 2025 aprobacion of desaprobacion di e Registro di Personal 2024.

E ta obligatoria pa den e periodo di 5 februari 2025 te cu 16 april 2025 pa entrega digitalmente e Registro di Personal 2024. 
Companianan cu no ta cumpli cu entrega di e Registro di Personal den e periodo menciona como tambe esnan cu no a entrega esaki e aña anterior ta den incumplimento cu articulo 30 di e Ordenansa Laboral 2013. DAO lo bay over na tuma accion contra esakinan. E compania lo por ricibi un sancion administrativo di Afl. 5.000,- pa no cumpli cu e obligacion di entrega di e Registro di Personal. Tene bon na cuenta cu den caso cu un Registro di Personal no ta corectamente yena, ta considera esaki tambe un incumplimento di parti di e compañía.

Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.

Si tin mas pregunta tocante e Registro di Personal por tuma contacto cu Sra. Louisetty Croes na 523-7722 of via email louisetty.croes@aruba.gov.aw of cu un funcionario di Bureau Arbeidsmarktonderzoek na 523-7720.