Earth Hour: Duna un ora pa naturalesa

Earth Hour ta un accion cu ta encera paga e luznan pa crea conscientisacion riba e importancia di nos naturalesa y con consumo di coriente, tin biaha innecesario, por afecta naturalesa y medio ambiente. Den Caribe Hulandes tambe tin gruponan cu ta participando na Earth Hour. E orario ta 8:30 di anochi orario local.

Na Aruba Directie Natuur en Milieu (DNM) tambe ta un di e participantenan cu lo paga luz di e edificio situia na Uncle Louis Store na B v.d. Veen Zeppenfeld straat #7 na San Nicolas. Esaki ta un accion simbolico cu ta manda un señal na comunidad cu naturalesa ta bou di menasa di entre otro cambio climatico.

Na 2007 World Wildlife Fund (WWF) a inicia cu e evento di "paga luz" na Australia y despues esaki a pasa pa San Fransisco y a sigui bay rond mundo. Wereld Natuur Fonds na Hulanda(WWF-NL) a acerca gobierno- y empresanan den Caribe Hulandes pa participa na Earth Hour. Hopi organisacion den region a confirma na participacion manera Directie Natuur & Milieu na Aruba, Tourism Corporation Boneiro y gobierno di Saba ta paga luz di nan edificio. Port St. Maarten lo desconcta e luznan no-esencial di e brug di Causeway. WWF-NL ta invita e comunidad local y otro organisacionnan pa nan tambe participa na Earth Hour.

Ademas di pagamento di luz, WWF ta pidi pa haci algo positivo pa mas cu 60 minuut na bienestar di nos mundo. Esaki por encera: come un cuminda vegetariano/vegano, haci mas na reciclahe, planta un mata y recoge sushedad. DNM na su turno ta haci un yamada na nos comunidad pa haci uzo di e registro di mata pa nos duna balor e importancia di existencia di matanan cu ta asina grandi cu mester clasifica esakinan como matanan monumental.

E participacion di e islanan den Caribe na Earth Hour ta mustra e dedicacion pa pone atencion na e consecuencianan cu cambio climatico ta trece cu ne y cu dia pa dia nos ta sinti e efectonan mas y mas. Islanan chikito ta extra vulenerabel pa cambio di clima. Esakinan ta efectonan manera subida di nivel di lama y e mundo cu ta keda bira mas calor. Debi na esakinan tin posibilidad di efectonan manera temperatura extremo, secura extremo, inundacion y horcan. Tur esakinan tin impacto grandi riba economia di e islanan, como tambe riba e bienestar y prosperidad di e naturalesa y su hendenan.

DNM ta logra realisa e pagamento di luznan pa e dia aki y ademas di esaki nos edificio ta incorpora cambionan cu ta sostenibel. E airconan su temperatura ta regula despues cu oficna cera cu ta 4:30 atardi asina ta evita mas consumo. E luznan tin un sistema automatico cu si e espacio no ta den uzo, e ta paga automaticamente. Ta colecta e awa di e airconan y uza pa e sistema di flush WC asina ta evita uza awa potabel di calidad halto. Den nos espacio di oficina tin un ‘greenwall’ cu matanan cu ta yuda cu filtracion di aire. Esaki ta DNM su aporte na nos naturalesa y mundo. DNM ta spera cu comunidad di Aruba tambe activa y asina aporta na Earth Hour cu ta un iniciativa bon y un accion generoso cu ta encera solamente bo esfuerso.