Controla bo “inbox” si bo tin un cita pa busca plachi di number

Si acaso a laga un otro persona traha un cita pa bo, verifica cu e persona si el a haya e-mail. DIMP por a manda e-email na e persona su e-mail adres y abo como doño di e number mes no ta na altura. Esaki no ta conta pa pensionado. 

Confirmacion di cita 

DIMP su sistema di cita ta genera un e-mail di confirmacion inmediatamente despues di haci e cita. Si acaso no a ricibi un mail, esey ta nifica cu algo no a bay bon. Kisas no a “submit” e cita of no a yena e e-mailadres corectamente. 

Recordatorio 

Prome cu e fecha di cita, lo cuminsa haya e-mail di recordatorio. Lo ricibi 3 recordatorio. 
Alabes e e-mailnan aki ta duna tur informacion importante relaciona cu e cita. 

Fecha por cambia 

Por sosode cu DIMP a cambia e fecha di e cita pa un fecha mas dilanti of e persona mes a pidi pa hala e fecha mas leu por ehempel debi na estadia den exterior. Ora DIMP “reschedule” un cita, nan sistema ta genera un e-mail mesora pa informa di e fecha nobo. 

Documento no ta na ordo 

Ora DIMP su administracion controla e documentonan y resulta por ehempel cu e pago no ta corecto of seguro a caduca, nan lo manda un e-mail pa notifica kico a sea bay robes of falta. 

Fecha a pasa 

DIMP ta hayando casonan di personanan cu no a bin busca nan plachinan debi cu nan no a controla nan e-mail of no a controla e e-mail na tempo y nan fecha di cita a pasa. Den e caso aki nan lo coopera pa yuda mas lihe posibel. Sinembargo nan no por garantisa cu e cliente lo ricibi su plachinan riba e mesun dia cu a contact Departamento di Impuesto.

DIMP su ekipo ta trahando duro pa yuda duna tur hende nan plachi di number. Pa facilita e proceso, tur comunicacion entre e cliente cu DIMP ta sosode via e-mail. Sea asina bon di controla bo “inbox” regularmente.