A inicia e proceso di certificacion di Oranjestad como e proximo Capital Culinario den Caribe
ORANJESTAD - Ministerio di Asunto Economico, Comunicacion y Desaroyo Sostenibel, a inicia e proceso di certificacion di Oranjestad pa bira e proximo “Capital Culinario” den Caribe como parti di e strategia pa revitalisa e centro di ciudad.
Esaki ta un reconocimento valioso di World Food Travel Association (WFTA) cu lo eleva e posicion di nos centro di ciudad.
E “destination certification” di WFTA, esta “Capital Culinario”, no ta solamente un titulo, sino tambe un testimonio di e herencia “culinario” rico y e diversidad di Oranjestad. E proceso lo pone nos cushina local riba e mapa mundial, promove turismo di cuminda y mehora e experencia di bishitante.
E aplicacion pa e certificacion como “Capital Culinario” ta parti di un strategia holistico pa revitalisa Oranjestad. Esaki ta inclui eleva seguridad y garantisa standard halto di limpiesa, mehorando e atraccion visual di e ciudad via proyectonan di embeyecemento, y hisa e accesibilidad di e area. Ademas ta facilitando e regreso di varios departamento gubernamental na nos centro di ciudad pa stimula negoshinan local. Tambe ta pone enfoke riba atrae mas persona, creando asina un ambiente interesante cu por haci mas evento y festival pa menciona algun. Na final, tur esaki lo haci centro di nos ciudad comercialmente mas factibel.
E proceso di certificacion ta encera un evaluacion completo di e calidad di nos cuminda, e diversidad di nos oferta y nos compromiso cu sostenibilidad y producto alimenticio local.
