A honra varios tocado di cah’i orgel riba dia di musico

E anochi a cuminsa cu un discurso di sr. Arthur Kelly riba e historia di Cah’i Orgel na Aruba, sigui pa un splicacion detaya di sr. Elias Halabi di e proceso con ta traha un Cah’i Orgel, despues a sigui un splicacion y presentacion di bailenan folklorico door di sr. Ferdinand Franca, y a cera e prome parti di e anochi cu un bunita poema dedica na Cah’i Orgel declama pa e hoben Tai Kong Trimon. 

Despues di un pauze den cual a resona musica di Cah’i Orgel, Minister di Cultura Xiomara Maduro di Cultura a hiba palabra pa asina repasa e lista di tur e baluartenan cu a ricibi un reconocemento riba Dia di Musico for di su persona. A reconoce e Cahanan di Orgel cu tin mas cu un siglo activo, e baluartenan cu ta preserva e tradicion di Cah’i Orgel y un grupo di hoben cu ta dedica na toca Cah’i Orgel y Wiri inspirando otro hoben pa nan tambe sigui cu e bunita tradicion aki.

Bou e categoria di “Cahanan di Orgel di mas di un siglo activo,” a reconoce:

• “El Porfiado” di Sr. Minguel Werleman cu ta activo ya pa 119 aña y ta e unico caha cu tin 9 pieza pa cilinder y 37 martiu. E caha tabata tin 5 doño y te ainda ta activo, representando Aruba cu orguyo. 
• “El Negrito Maldito” di Sr. Rodney Werleman cu tin 118 aña y a bini for di Italia. E caha aki ta un simbolo di constante dedicacion. Rodney Werleman ta preserva su esplendor y ta mantene e tradicion di musica di caha di orgel cu ela hereda di su welo Ale Werleman den feliz memoria.
• “El Diamante” di Sr. Higinio Alejandro, miho conoce como ‘Patan’ Farro, cu tin 109 aña. E caha aki ta un simbolo di constante uzo y dedicacion. Patan Farro no solamente ta su doño, pero tambe su restaurado y un wicharero cu pasion pa e arte. 
• “El Trovador” di Sr. Roberto ‘Roque’ Koolman, ta un caha cu yega na Aruba na aña 1920 for di Italia. Roberto Koolman a renoba su condicion y preserva su historia, manteniendo e nomber original di e caha ya pa 104 aña.
•  “Mi Deseo” di sr. Nelson Tiel, cu ta un caha cu tin 116 aña y a bin for di Novara, fabrica di caha di orgel na Italia aña 1907. E caha tin 4 cilinder y claba door di Alphonso (Buchi) Boekhoudt. 

Como “Baluarte di Caha di Orgel” a reconoce:

• Sr. Elias Halabi cu ta trahado di Cah’i di Orgel y clabado di cylinder. Elias ta naci na Corsou, pero residencia na Aruba y ta yuda fortifica e hermandad entre Aruba y Corsou riba tereno di Cah’i di Orgel. Elias ta doño di varios Cah’i Orgel y tambe a traha e Cah’i Orgel “Pequeño Diablito.”
• Sr. Juan Curiel cu ta dedica na su caha “Nieva Maria”, cu a yega Corsou tras un largo proceso y awe ta un instrumento vibrante na varios evento cultural.
• Sr. Nelson Tiel cu ta doño di e cahanan “Istela” y “Mi Deseo.” Nelson e ta honra su famia cu e nombernan di su cahanan y ta preserva nod historia y tradicion na un nivel superior.
• Sr. Denny “Den” Thijzen cu ta un amante di tradicion di Cah’i Orgel cu un historia personal cu "Mi Amor," su fiel acompañante den ambiente di fiesta y cultura.
• Sr. Reginald ‘Nai’ Felicia cu su caha “Bucurui.”
• Nai ta un amante di e cultura cu ta organisa e famoso festival "Ban Topa cu nos Cah’i Orgelnan,” cu ta uni nos comunidad cada aña den armonia di Cah’i Orgel.
• Sr. Ruben Boekhoudt cu su caha "Flores de Colores,” cu ta un digno heredero di un famia di Cah’i Orgel, di cual su creatividad ta refleha den su caha vibrante. 

Reconocemento di estimulo a bay pa e hobennan:

• Igmar Maduro kende ta e heredero di “Flor di Macubari” y un pionero hoben cu ta skirbi cantica nobo y ta activo na festivalnan di Cah’i Orgel.
• Joangelo ‘Giovanni’ Geerman kende influencia pa su omo Esy Geerman, ta dominando wiri y ta preservando e arte cu su propio caha, “Nos Herencia.”
• Jeromaine “Jerro” Paesch cu ta domina Cah’i Orgel cu un maestria notabel, tocando regularmente pa uni su famia den nos herencia musical.
• Peterangelo Ras cu na aña 2021 a organisa un festival di Cah’i Orgel, “Nos Dushi Caha.”Peterangelo ta un wicharero cu ta inspira cu su pasion pa promove y preserva nos tradicion.

Minister Maduro ta gradici Departamento di Cultura pa organisa e bunita anochi den cual e baluartenan di Cah’i Orgel por a wordo honra pa nan esfuerso pa conserva y sigura cu e musica y historia di e Cah’i Orgel por sigui resona y laga nos sinti nos mes orguyoso di nos cultura.