War Room a cuminsa : un solo frente den reino
ORANJESTAD – Cuerpo Policial ta anuncia e proyecto “War Room” cu ta un proyecto di strategia cu Reino Hulandes a cuminsa oficialmente na nos Pais ruman Corsou bao di liderazgo di e coordinado di e Plataforma di Coordinacion di Informacion Interinsular (IICP).
Den e proyecto piloto unico aki, tur cinco Cuerpo Policial di Reino Hulandes como tambe RST, KMar y Warda Costa, ta uni forsa contra criminalidad transnacional.
War Room ta un centro caminda specialistanan di informacion y analistanan ta traha hunto durante dos siman intensivamente. Meta ta pa identifica rednan criminal cu ta opero den Reino Hulandes.
E informacion colecta ta forma e base pa intervencion of investigacion penal. War Room ta
marca un paso importante pa un colaboracion structural y duradero den e lucha contra criminalidad cu ta minando nos sociedad.
Altocomisario Ramon Arnhem ta indica di tin hopi aprecio pa e organisacion y e participantenan di War Room. “Ta nos prioridad regional den conhunto cu Colegio di Hefenan di Polis pa intercambia informacion na un manera eficaz den Reino. War Room ta un resultado bunita di esaki”, segun Altocomisario Arnhem.
