Validez di e listanan di candidatonan

E proceso a inicia dia 1 di november 2024 unda Hoofdstembureau a reuni den un sesion cu no tawata publico pa revisa e lista di candidatonan cu tawata entrega dia 18 di october 2024 pa asegura cu e lista di candidatonan ta conforme cu e ley di Ordenansa Electoral.

A notifica tur partido politico dia 4 di november 2024 via email tocante e coreccionnan necesario cu mester haci riba nan lista y nan tin te cu dia 7 di november 2024 pa haci e coreccionnan necesario.
Despues ta sigui cu e prome sesion publico di Hoofdstembureau pa oficialmente anuncia e validez di e lista di candidatonan dia 8 di november 2024 pa 10:00 AM.

Den caso cu no tin apelacion den dos dia contra di e decision aki, Hoofdstembureau lo procede cu lot pa numera e listanan y asigna color (tambe via di lot si ta necesario) den un sesion publico dia 13 di november 2024 pa 10:00 AM.

Si acaso tin apelacion na Corte tocante e validez di e lista di candidatonan, e sesion di numeracion y asignacion di color lo tuma lugar mas tarda dia 21 di november 2024.

Hoofdstembureau ta invita tur votado y interesado pa tuma nota di e sesionnan publico, cu lo tuma luga na Registro Civil y Censo riba e fechanan menciona y pa keda pendiente pa e link virtual di e livestream cu lo publica riba nos rednan social.

Pa mas informacion, bishita e website oficial di Conseho Electoral Aruba na www.er.aw y sigui nan riba Facebook y Instagram @consehoelectoralaruba. 

E plataformanan lo sirbi como un recurso importante pa votadonan, partidonan politico y publico general, keda al dia cu anuncionan, fechanan y guia relevante pa e eleccion di Aruba.