Trade Mission pa Surinam; Explorando posibilidadnan comercial
ORANJESTAD - Despues di a organisa un Trade Mission exitoso pa Colombia, Investment Summit na Hulanda, y un Virtual Business Matchmaking cu Venezuela, Ministerio di Asunto Economico, Comunicacion y Desaroyo Sostenibel, conhuntamente cu Camara di Comercio Aruba (KVK), Departamento di Asunto Economico, Comercio y Industria (DAECI), y Aruba Trade & Industry Association (ATIA) ta organisa un trade mission pa comerciantenan local na Surinam for di 24 pa 28 di juni proximo.
Cu e trade mission aki kier explora e posibilidadnan comercial cu Surinam.
Surinam ta un pais conoci pa exporta azeta, oro pero tambe metal, palo, material di construccion y mucho mas. P'esey ta importante pa hunto cu diferente stakeholder local, bay Surinam y explora e posibilidadnan comercial. Negoshinan por wak e mercado di Surinam como un oportunidad pa crece y trece diversificacion den nan portfolio di producto of servicio. Esaki lo duna e consumidor local mas acceso na productonan di calidad, y posiblemente na un prijs mas bentahoso.
Recientemente un delegacion di Surinam a bin Aruba pa topa cu comerciantenan local y asina a cuminsa sondea e posibilidad pa aumenta actividad comercial entre e dos paisnan.
Un invitacion ta bay na tur comerciante cu ta interesa pa forma parti di e Trade Mission aki pa registra via e link pa un sesion di informacion cual lo tuma luga diahuebs, 23 di mei, na oficina di DAECI. Por registra via www.surveymonkey.com/r/SurinameTM
