Tercer edicion di proyecto di Studentenkamer

E proyecto a inicia na aña 2022, na momento cu Arubahuis a indica cu tin problema grandi cu vivienda di studiante na Hulanda y a urgi Ministerio di Enseñansa y Deporte pa organisa sesion informativo pa e studiantenan cu ta continua cu nan estudio na Hulanda.

E cantidad di refugiado cu ta yega Hulanda for di paisnan den crisis, ta pone un presion enorme riba e cantidad ya limita di vivienda. Aña pasa e lista di espera pa haya un camber tabata entre 1 pa 2 aña, pero pa e aña aki esaki a bira entre 2 pa 4 aña. Na ciudadnan manera Utrecht y Eindhoven, e cantidad di camber ta limita y e lista di espera ya ta entre 3 pa 4 aña.

Durante e sesion informativo lo tin diferente orado profesional cu la brinda informacion di, entre otro alohamento (huisvesting) na Hulanda y lo comparti e retonan pa haya un vivienda na Hulanda. E meta ta pa yuda y motiva e alumnonan inscribi pa camber (studentkamer) na tempo.

Seccion Facilidad pa Estudio di Departamento di Enseñansa di Aruba (DEA) lo duna informacion di e fiansa di Arubalening y con pa yega na un prestamo, alabes lo contesta preguntanan relaciona cu e topico aki. Paloma Osorio di Fundacion Plan di Bida lo duna informacion na e alumnonan tocante maneho di presupuesto, mientras Lisanne Sambo – Gomez di Realign Coaching, Consultancy & Services lo trata e topiconan: escogencia di estudio y con pa yena e formularionan. Franklin Seute, autor y orado di e buki “Living Rich as a Student in the Netherlands” lo comparti varios tips valioso di entre otro, maneho di placa como studiante. High Edcuation North America Expo lo presenta e diferente posibilidadnan cu tin pa studia na Merca.

Pues, e alumnonan di Havo 3, 4, 5, Vwo 4, 5, 6, EPI, Mon Plaisir Havo, De Schakel y nan mayor ta cordialmente invita pa e session informativo aki.