Aruba su awanan teritorial ta conta cu cuatro sorto di especie di turtuga di lama cu for di maart te cu december ta subi tera na costa pa pone webo.

Ta trata aki di:

1. Caret (Eretmochelys imbricata);
2. Cawama (Caretta caretta);
3. Turtuga blanco;
4. (Chelonia mydas);
5. y tambe e Driekiel (Dermochelys coriacea).

Leynan local y internacional ta prohibi pa mishi of causa daño na e turtuga of su webonan, pa cual DNM ta urgi comunidad pa ora observa turtuga riba beach, pa no yega cerca y stroba e proceso di broei. Mirando cu pronto e temporada di campamento ta cuminsa, ta anticipa un volumen mas grandi y concentra di usuario di lama, pa cual DNM ta avisa di antemano pa tene distancia ora topa cu neishi of mira turtuga riba beach.

Ta urgi comunidad pa respeta nos recursonan natural y e bida marino. Fundacion TurtugAruba ta e autoridad cu ta monitor turtuganan di lama ora nan subi beach pa pone webo y ta recomenda pa yama nan mesora na 592 9393 si topa cu turtuga riba tera pa broei.

DNM ta duna algun sugerencia pa usuarionan di lama:

• Ora di snorkel of duik, tene un distancia y keda leu di e turtuganan di lama. No mishi cu nan. Tampoco duna nada di come;
• mantene nos beachnan limpi di sushedad, hiba tur desperdicio cas y no laga esaki riba beach.
• tapa tur buraco cu ta coba den santo blanco pa recreacion y laga e santo plat pa facilita turtuganan cu lo uza e sitio pa broei;
• no uza luz riba of banda di lama anochi, mirando cu e turtuganan di lama ta sensitivo na luz artificial, esaki por causa cu ta desvia e turtuga di su proposito.

Den caso cu nota cu tin hende cu no ta mantene nan mes na e leynan en cuestion, por fabor contacta polis.

Hunto nos por yuda conserva nos naturalesa pa e genereacion cu ta bini y respeta nos biodiversidad.