SVB a ricibi oficialmente e apoderacion pa aumenta reparatietoeslag pa pensionado cu 250 Florin
ORANJESTAD – Diaranson 2 di april, Minister di Finansa, Economia y Sector Primario mr. Geoffrey Wever, conhuntamente cu Prome Minister mr. Mike Eman, Minister di Relacionnan di Reino, Enseñansa, Hubentud, Innovacion y Deporte, mr. Gerlien Croes, Minister di Salud Publico, Asunto Social, Cuido di Adulto Mayor y Maneho di Adiccion drs. Mervin Wyatt-Ras y Minister di Turismo, Transporte y Sector Primario, mr. Wendrick Cicilia, a haci entrega oficial di e decision di Conseho di Minister, cual ta autorisa SVB pa aumenta e reparatietoeslag pa tur pensionado cu Awg. 250,- mensualmente, desde 1 di mei 2025.
Director di SVB, ing. Edwin Jacobs, a confirma di lo implementa conforme esaki
E aumento di reparatietoeslag ta un alivio importante y na ora pa nos pensionadonan. Minister Wever a expresa su gratitud na tur su coleganan cu a haci un esfuerso extraordinario pa por a logra presenta e cambionan necesario den e presupuesto cual a sirbi como fundeshi pa por logra e paso importante aki.
