“Studenten Commissie Aruba” a keda instala oficialmente na Arubahuis
ORANJESTAD - Recientemente, a tuma luga un ceremonia na Arubahuis pa instala oficialmente e prome miembronan di e “Studenten Commissie Aruba” (SCA).
Esaki a sosode den presencia di Prome Minister demisionario Evelyn Wever-Croes, Minister Plenipotenciario demisionario Ady Thijsen, director di Arubahuis Joselin Croes, mentornan, representantenan di ministerio di OC&W y personal di Arubahuis.
E “Studenten Commissie Aruba” ta consisti di shete (7) miembro kendenan a keda apunta despues di un procedura di solicitud. E miembronan – reparti den diferente region - ta Roderick W. Atmowirono, Chloe Manon Ruiz, Alejandra Mc Bene Courtar Moreno, Nathan Perez, Emile Lambrinos, Tai Kon Ashley Trimon-Lee, Delaiah Edilianne Tromp.
Na e ocasion aki Minister Plenipotenciario demisionario Ady Thijsen a accentua e importancia di tin un organisacion di studiante cu conoce e mundo estudiantil y cu por raporta bek na Arubahuis.
E idea pa lanta un “Studenten Commissie Aruba” ta e resultado di e diferente sesion di brainstorm y encuesta haci bou di e studiantenan. Aki a sali afo cu e deseo di e studiantenan ta pa haya oido y pa tin mas voz riba crea maneho, plan y guia di studiantenan Arubiano na Hulanda. Meta di SCA ta pa duna conseho na Arubahuis riba asuntonan cu ta di interes pa studiantenan Arubiano na Hulanda. Alabes SCA lo yuda pa fortifica e lasonan entre Arubahuis y studiantenen, yuda Arubahuis cu idea pa organisa encuentronan, workshops, jobfairs y duna informacion nan studiantenan.
E miembronan di SCA a keda nombra pa e periodo di 7 di februari 2025 te cu 31 di december 2026. Despues lo start un procedura di solicitud nobo pa apunta e miembronan nobo pa e siguiente periodo di un aña.