Spirit of Discovery ta haci yamada historico na Aruba

Manera tradicion, a celebra esaki cu un ceremonia tradicional di intercambio di plakaat, cu ta marca e bishita oficial na nos dushi isla.

Durante di e ceremonia, por a conta cu presencia di Monica Bos – Cruise Manager di Aruba Tourism Authority (ATA), Mario Arends – Chief Commercial Officer di Aruba Ports Authority (APA), y miembronan di Caribbean Port Agencies cu a yuda na facilita e bishita di e barco crucero.

Capitan di Spirit of Discovery a entrega un plakaat conmemorativo personalmente na
representantenan di ATA y APA. Alabes, e representantenan di Aruba, cada un, a obsekia un plakaat conmemorativo na e capitan como un muestra di aprecio y celebracion entre socionan. E ceremonia aki ta resalta e importancia di mantene un relacion fuerte entre lineanan crucero y e destinacion, promoviendo turismo y crea experencianan inolvidabel pa huespednan y tripulantenan di e barco crucero.

Saga Cruises, cu su cede situa den Reino Uni, ta specialisa den experencianan di biahe exlusivo pa huespednan mayor di 50 aña. Nan ta combina comfortablidad, elegancia, y servicio di nivel halto. Spirit of Discovery ta e di dos barco crucero luhoso den e flota di Saga, hunto cu su ruman Spirit of Adventure. Tur dos barco crucero ta conoci pa nan ambiente intimo, acomodacion luhoso, y programanan specificamente scogi pa destinacionnan na nivel mundial. Spirit of Discovery tin capacidad pa acomoda 999 pasahero y ta conta cu 554 cabina cu ta garantisa un experencia personalisa y relaha. E barco crucero aki ta destaca pa e categoria di restaurant cu e tin abordo, entretenimento mundial, y enfoke riba actividadnan eleva.
Ademas Spirit of Discovery ta conta cu 530 miembro di tripulacion.

Spirit of Discovery ta sali for di Inglatera y tin un duracion di 49 dia, ta bishita Madeira, Sint Lucia, Barbados, Grenadines, Corsou, Aruba, Colombia, Panama, Costa Rica, Honduras, Belize, Mexico, Texas, Louisiana, Florida, Bermuda, Islanan Azore di Portugal y regresa Portsmouth Inglatera.

Turismo di Crucero na Aruba
Aruba ta continua na reforsa su posicion como lider den destinacion principal pa lineanan crucero den Caribe. Nos cultura, beachnan, bida marino, y hospitalidad
generoso, ta haci cu Aruba ta keda un destinacin preferi entre huespednan crucero.

Yamando Spirit of Discovery un bonbini, no solamente ta fortifica relacion cu Saga Cruises, pero alabes ta alinea cu e vision di Aruba di ofrece experencianan excelente pa e huespednan.