Sero Colorado Memorial ta cla pa start
ORANJESTAD – Recientemente, Minister di Turismo y Salud Publico demisionario Dangui Oduber a anuncia cu e proyecto di Sero Colorado Memorial ta cla pa inicia pronto.
Como parti di a maneho di turismo y preservacion di nos historia, na comienso di 2023 a colabora cu e comision di Aruba Outdoor Amenities, hunto cu Ministerio di Infrastructura y Tourism Product Enhancement Fund (TPEF) pa sigui cu e vision pa preserva y restaura nos historia.
Den cuadro di esaki a proyecta pa preserva y embeyece e area di bunker di Segunda Guera Mundial riba Sero Colorado.
Lo restaura e parkeo di e area, embeyece y tambe introduci un “Memorial Area” den cual nos localnan y turista por lesa y conoce mas di nos historia. Mas bien riba e historia di e area, cual ta e bunker di municion, lighthouse y nan funcion tempo di Segunda Guera Mundial.
Esaki ta un otro proyecto cu tin varios luna caba den preparacion y cu ta cla pa inicia.
Trabounan ta premira pa start pronto y lo dura algun luna. Ta urgi un y tur pa tene cuenta cu e area durante cu esaki ta den construccion.