Señal y sintomanan di Sarampi

Sarampi ta afecta e via respiratorio y despues ta plama den ful e curpa. E prome sintomanan ta dura entre 4 pa 7 dia y ta encera:

• Nanishi ta core;
• Keintura;
• Tos;
• Wowo cora y ta core awa;
• Manchanan blanco chikito parti paden di e boca.

Entre 7 cu 18 dia, despues di a contagia cu e virus, ta aparece un rash cu mayoria bes ta cuminsa na cara y nek pa despues plama ariba ful e curpa. E rash ta dura den mayoria caso alrededor di 5 pa 6 dia prome cu e disparce.

Mayoria morto a consecuencia di Sarampi ta pa motibo di complicacion relaciona cu e malesa. Complicacionnan cu por presenta ta:

• Pulmonia;
• Meningitis;
• Cieguedad;
• Ataca;
• Infeccion di horea;
• Diarea severo cu deshidratacion.

Tur persona cu no ta vacuna of esnan cu a vacuna y no a desaroya inmunidad por contagia. Muchanan no vacuna y hende muhe na estado ta esnan mas na riesgo pa desaroya complicacion. Si un hende muher na estado haya Sarampi durante su embaraso esaki por ta hopi peligroso pa e mama y por resulta den un parto prematuro.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.