Screening medico pa solicitante di permiso di DIMAS ta posibel tambe na Urgent Care
ORANJESTAD - Personanan (inmigrante) cu a solicita pa un permiso di estadia na Aruba y a haya un ‘Voorlopige Toelating Aruba’ (VTA) for di DIMAS, mester presenta cerca un dokter aproba pa Directie Volksgezondheid (DVG) pa un screening medico obligatorio.
Anteriormente por a haci e screening aki unicamente pa dokternan di Medwork pero desde dialuna dia 10 di februari 2025 e screening aki ta posibel tambe na Urgent Care.
Medwork: Pa traha un cita pa e screening medico, e solicitante mester presenta personalmente na Medwork situa na Margrietstraat 3, Oranjestad, di dialuna pa diabierna entre 8:00- 12:00 y 13:00- 16:00 cu un paspoort valido y e formulario ‘Voorlopige Toelating Aruba’ (VTA). Tambe mester trece e paspoort cu cual a drenta Aruba ultimo biaha. E gastonan pa cu e screening ta Afl. 75.00 y mester paga esaki na momento cu e solicitante bin pa traha e cita. Medwork lo suministra e cartanan pa e diferente tipo di testnan, manera test di PPD/Mantoux, radiografia
di pecho y analisis di sanger. Mester paga e costo pa e testnan na e respectivo instancianan medico unda lo haci esakinan.
Urgent Care Aruba (UCA): Ta ofrece servicio na Noord Medical Center situa na Noord 63 y Punta Brabo Medical Center na Caya Punta Brabo 11. No ta necesario pa traha cita; aplicante por bay personal cu un paspoort valido y e carta di ‘Voorlopig Toelating Aruba’ (VTA). Tambe mester trece e paspoort cu cual a drenta Aruba ultimo biaha. E gastonan pa cu e screening ta costa Afl. 75.00. E localidad na Noord ta habri dialuna pa diabierna di 8:00-16:00 y diasabra di 8:00-12:00.
Aplicantenan por completa e examinacion medico cu ta necesario, e test di laboratorio y e x-ray di pecho na e mesun localidad y mester paga e costonan pa e testnan na momento di ricibi e respectivo servicio. E examinacion medico cu e testnan respectivo pa inmigracion lo ta cla den
24 ora.
Riba e pagina web aki por haya mas informacion riba e proceso y instancianan medico unda por haci e diferente testnan.
Pa mas informacion:
- Like nos Facebook page Directie Volksgezondheid DVG Aruba
- Follow nos riba Instagram directie_volksgezondheid_aruba
- Bishita www.dvg.aw
- Yama nos na 5224200 of manda bo email na servicio@dvg.aw
