Rev. Arsobispo Jason Gordon nombra como Administrado Apostolico di Obispado di Willemstad

E nombramento aki ta tuma luga despues cu Mgr. Luis Secco, nos kerido Obispo, ta bay cu pensioen despues di hopi aña di entrega y liderato pastoral.

Obispado di Willemstad completo kier expresa su gratitud profundo na Mgr. Luis Secco pa su dedicacion incansabel, cuido pastoral y liderato spiritual durante su tempo di sirbishi. Su legado di entrega, marca pa su gran compromiso cu pueblo di Corsou, Boneiro, Aruba, Sint Maarten, Saba y St. Eustatius, lo keda como inspiracion pa e generacion di awe y mañan. Nos ta desea pa Dios sigui bendiciona su bida y duna bendicion na e etapa nobo di su bida.  

Un Administrado Apostolico ta un Obispo cu Santa Sede ta nombra pa yuda cu e gobernacion y cuido pastoral di un Obispado den un periodo di transicion. Mgr. Gordon, conoci pa su zelo pastoral y deseo pa fortifica comunidadnan di fe, lo guia Obispado di Willemstad cu sabiduria y devocion durante e tempo aki.

Obispado di Willemstad ta duna Mgr. Gordon un caluroso bon bini den su rol nobo y ta sigura su oracion y sosten pa e mision importante cu e ta asumi. 
Cu Dios sigui bendiciona nos Diosesis, y cu nos keda uni den fe mientras nos ta sigui avansa bao di guia di Spirito Santo.