Reduccion di zonido, ta un stap positivo den direccion di cuido di e oido

Den cuadro di e conseho duna di parti Departamento di Salud Publico di Aruba (DVG) pa cu cuido y proteccion di e oido, por informa cu a tuma nota di un cambio den direccion positivo for di companianan di zonido den e parada di diadomingo. Den pasado e nivel di zonido den parada tawata rond di 115 db, diadomingo por bisa cu mayoria compania di zonido den e parada a marca entre 90 cu 102db maximo na momento cu a midi. Apesar cu e conseho di DVG den su linea di maneho pa cu zonido ta menciona cu pa den parada ta conseha maximo 90db na un distancia di 10 meter, DVG ta mira cu companianan di zonido a haci esfuerso pa cuminsa reduci e db, nan a demostra di por y tambe kier uni na e causa pa yuda cuida e oido.

DVG conhuntamente cu demas stakeholder ta encurasha comunidad tambe pa sigui bisti nan earplugs. Reduccion di e decibel so no ta sufiente, ta rekeri tambe accion di doño di curpa pa bisti su earplugs y pa mayornan percura cu nan muchanan tin nan earplugs bisti na eventonan musical.

Di parti DVG nos ta gradici companianan di zonido y nan tecniconan pa a cuminsa cu reduccion di zonido y ta encurasha nan pa sigui haci esaki na tur parada te ora nos logra e meta di 90db maximo. Tur cambio ta tuma tempo, pero cu stapnan chikito y boluntad grandi por logra un maneho di zonido saludabel, agradabel y sigur pa un y tur.

Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw