Recordatorio pa cu proceso pa saca of renoba certificado di salud

E file aki ta den archivo.

ORANJESTAD - Dienst Warenkeuring en Hygiene (DWH) di Departamento di Salud Publico cu ta encarga cu otorgamento di e carchi di salud of tambe yama “carchi berde” ta informa lo siguiente. 

Segun ley di Personeelsbesluit warenverordening AB 1995 no. GT 2 tur persona cu ta traha cu alimento y/of bebida designa pa consumido mester tin un Certificado di Salud (ex-Carchi Berde) na ordo. E Certificado di Salud mester ta valido y visibel pa e inspectornan di seccion di DWH di Directie Volksgezondheid na tur momento.

Pa por haya un Certificado di Salud ( ex-Carchi Berde) e persona mester cumpli cu lo siguiente.

Pa prome peticion:

  • Acudi na seccion di Dienst Warenkeuring en Hygiëne di Directie Volksgezondheid na Dr. Oduberstraat 1;
  • e persona mester acudi cu un identificacion:
    • Un cedula di Aruba valido;
    • Of un paspoort of rijbewijs valido conhuntamente cu un papel di censo di Afl. 5,- (no mas bieu cu 6 luna)
  • despues ta acudi na Financiën di Directie Volksgezondheid pa paga Afl. 30,-

Renobacion:

  • Acudi na seccion di Dienst Warenkeuring en Hygiëne di Directie Volksgezondheid na Dr. Oduberstraat 1;
  • e persona mester acudi cu un identificacion valido:
  • despues ta acudi na Financiën di Directie Volksgezondheid pa paga Afl. 30,-

Testnan cu mester haci:

Test na un laboratorio y ta paga Afl. 40,- pa test di faeces (pupu) y lo mester entrega e faeces (pupu) no mas tarda cu 2 dia cu a cuminsa cu e proceso.

Thorax Test (Röntgen). Esaki ta pa  personanan di (18 aña+) y lo mester saca un potret di thorax (pecho). Pa e test aki mester acudi na Hospital, ImSan of Urgent Care pa saca x-ray, esaki tin un costo tambe.

Despues di 10 dia di trabou cu e persona a entrega e faeces (pupu) na Laboratorio, por acudi na seccion Dienst Warenkeuring en Hygiëne di Directie Volksgezondheid pa busca e Certificado di Salud (ex-Carchi Berde).

E Certificado di Salud tin un validez di 1 aña, e fecha di vencimento ta poni ariba e Certificado di Salud.

Pa mas informacion por tuma contacto libremente cu seccion Dienst Warenkeuring en Hygiëne di Directie Volksgezondheid na telefon 522-4200 of via email: dwh@dvg.aw.

Certificado di salud