Qredits Aruba ta celebra su di 8 aniversario
ORANJESTAD - Qredits Aruba a inicia na aña 2017 y despues di ocho aña a financia mas cu 500 compania local, resultando den un inversion di Afl. 19 miyon den e economia di Aruba.
Den e ultimo ocho añanan Qredits Aruba a yuda mas cu 3,000 persona cu ta aspira pa bira of ta un empresario local, cu microfinanciamento, programanan educacional, guia y entrenamento personalisa por medio di e “BeYourOwnBoss program”, “Small Business Academy”, y “coaching y mentoring”.
Durante e ultimo aña Qredits Aruba a introduci diferente proyecto y producto nobo, manera e Qreative Business Academy, cu e enfoke riba e sector creativo y e Energy loan, cu ta promove sostenibilidad den empresanan local.
Tambe a continua cu e proyecto Agri Fund, unda un total di 10 agricultor comercial a ricibi e Agriloan pa por cuminsa of expande nan negoshi. Ademas, un total di 60 agricultor a tuma e curso di Agri Business Academy pa por desaroya nan propio plan di negoshi.
Qredits Aruba su contribucion na e desaroyo di e sector empresarial na Aruba ta significante y ta refleha un impacto social economico hopi impresionante durante e ultimo ocho añanan. Mas di 1,000 cupo di trabou a wordo crea por medio di Qredits Aruba su empresarionan. 78% di Qredits Aruba su empresarionan ta activo ainda despues di 5 aña di existencia. 31% di Qredits Aruba su empresarionan ta “startups”, mientras 64% di e empresarionan aki no por a cuminsa cu nan popio negoshi sin e ayudo di Qredits Aruba.
Qredits Aruba ta gradici tur empresario, coach y partner pa e confiansa y e bon colaboracion durante e ultimo ocho añanan.