Proyecto piloto di “Entrega di Cuminda Cayente” pa adultonan mayor

E proyecto piloto aki, cu lo tuma luga over di un periodo di 4 luna, ta encera entrega di cuminda cayente na un grupo vulnerabel cu edad riba 65 aña cu ta registra na FPNC, cu no tin suficiente entrada pa por sigura un cuminda diario pa nan mes.

Ministerio di Asunto di Adulto Mayor ta consciente cu tin un crecemento den e grupo di adulto mayor cu no tin un entrada fiho of tin un entrada limita cu ta causa cu nan ta sufri di insiguridad alimentario y mal nutricion. E colaboracion cu FPNC pa e proyecto piloto aki lo yuda eleva e calidad di bida di nos grandinan.

E proyecto lo start cu entrega nan diario di cuminda cayente durante siman, y adicionalmente, lo inclui dos bes pa siman un pakete di desayuno. Ta premira cu e proyecto lo yuda por lo menos 50 adulto mayor rond di Aruba den e fase inicial, cu plan pa amplia e proyecto.

Cuido di nos adultonan mayor ta di suma importancia pa nos comunidad. Colaboracion cu sosten y aporte di instancianan social por yuda coregi problemanan di insiguridad alimentario entre esnan cu ta mas vulnerabel den nos comunidad.

Ministerio di Asunto di Adulto Mayor hunto cu FPNC lo traha hunto cu partnernan manera Voedselbank, pa coordina cu restaurantnan pa preparacion di cuminda pa asina cumpli cu e necesidadnan di cada participante den forma mas optimal posibel.

Lo monitor e proyecto piloto aki di cerca pa por evalua con pa stimula mas participacion pa di e forma aki por, no solamente sigura e continuacion di e proyecto a largo plaso, pero tambe subi e cantidad di adulto mayor vulnerabel cu por asisti, garantisando cu nos grandinan por keda biba mas largo den nan mesun cas, cu ta locual hopi di nan ta desea.