Proteccion mas fuerte pa tur consumido na Aruba pronto cu un base legal mas fortifica

Den cuadro di esaki, Aruba Fair Trade Authority a organisa un charla na Universidad di Aruba caminda a expande riba e esfuersonan andando, ambos pa proteccion di compe-tencia husto, pero principalmente riba e tereno di proteccion di consumido.

E Landsverordening Bestuursrechtelijke Handhaving Consumentenbescherming, cual awo ta na Parlamento di Aruba pa tratamento, unabes na vigor, lo fortifica e base legal pa garantisa cu de-recho di consumido no ta keda solamente riba papel.

Inicialmente, AFTA tabata enfoca principalmente riba regla di competencia husto, evitando cartel di negoshi y acuerdo ilegal di prijs. Awor cu e ley nobo aki, AFTA ta ricibi un rol crucial den proteccion di consumido, cu mas poder pa actua contra abuso y violacion sistematico di derecho di e consumido.

Un mercado mas protegi pa tur consumido

Pa formalisa e desaroyo aki, e Landsverordening Bestuursrechtelijke Handhaving Consumentenbescherming ta trece varios cambio clave.

E cambionan aki ta nifica cu:

1. AFTA por investiga, monitorea y tuma accion contra propaganda falso, manipulacion di consumido of di producto y servicio cu no ta cumpli cu e calidad prometi. AFTA ta haya mas poder pa actua y sanciona (si mester) esnan cu no ta cumpli cu regulacion di negoshi husto.
2. Negoshinan ta obliga pa cumpli cu standard di calidad rasonabel pa producto y servicio, evitando promesa falso of engaño, manipulacion di prijs, y otro mal practica di negoshi.
3. Consumidonan ta haya un portal digital, unda nan por haya informacion cla riba nan de-recho, y den caso ta sinti cu a viola un di su derechonan, por entrega un keho di forma mas facil. Si ta resulta cu ta un patronchi sistematico, AFTA tin tur autoridad pa actua.

Confiansa den mercado ta esencial pa crecemento

Minister di Asunto Economico, Comunicacion y Desaroyo Sostenibel demisionario Geoffrey Wever ta enfatisa cu e introduccion di e ley aki ta un di e pasonan mas importante den proteccion di consumido na Aruba, reforsando asina e leynan di derecho di consumido. Un regulacion fuerte no solamente ta proteha e consumido, pero tambe ta beneficia e empresario cu ta traha cu integridad, eliminando competencia desigual di esnan cu ta bay contra regulacion.
Confiansa den e mercado, claridad riba derecho y actuacion real ("handhaving") ta esencial pa un pais cu ta crece economicamente y socialmente. Aruba ta drenta un epoca nobo di proteccion di consumido, y nos ta invita tur hende pa sigui e desaroyo di e ley aki, pa asina tur consumido por conoce y uza su derecho cu mas confiansa.