Prome Minister ta adverti riba "scam" cu ta circula riba media social
ORANJESTAD – Den e ultimo dianan aki, por a tuma nota di un scam cu ta circulando riba varios plataforma di media social afirmando cu residentenan di Aruba por ricibi un suma grandi di placa a traves di un programa di inversion cu ta liga na un entidad cu e nomber "PrimeAurora".
Esaki ta totalmente falso y autoridadnan di Aruba hunto cu expertonan cibernetico ta investigando e scam aki.
Cualkier persona cu ta compromete nan mes riba e oferta fraudulento aki, ta core riesgo di perde nan placa. Prome Minister Evelyn Wever-Croes ta enfatisa cu Gobierno di Aruba no tin nada di haber cu e acto delincuente aki y tampoco cu esaki tin sosten legal di institutonan financiero di nos pais.
E mensahe cu ta circula ta sugiri cu si un persona inverti un suma di placa di AWG.200,-, e por ricibi pago regular y pa bida di devolucionnan di impuesto di un suma di AWG.6.500,- Esaki ta un trampa cu ta propaganda placa facil y ta conoci cu tin usarionan di media social cu ya a cay den dje.
Ta urgi cada ciudadano pa keda atento y no cay den e trampa di cualkier oferta financiero sospechoso of di plataformanan online cu ta haci ofertanan y promesa con pa haya placa facil. Conseho ta keda pa cada usuario di media social, raporta cualkier oferta dudoso.
E fuente di algun scam ta bin for di e plataforma di noticia local Aruba Today pero e nomber di e website no ta coresponde na e plataforma di Aruba Today. Esaki ta un detaye cu usuarionan di internet mester tene cuenta cu ne pa saca afo e autenticidad di informacion.
Ta importante pa sigui desaroyonan financiero via canalnan corecto entre otro, via autoridadnan concerni, via nos planta di television nacional, radionan local, website di Gobierno, paginanan social di Gobierno y corantnan.
Ora cu ripara un link, y ta duda, no habri esaki; raporta e link na e plataforma relevante; si bo ta duda, puntra un famia of amigo; educa bo amigo y famianan tocante e peligronan di estafa via internet, specialmente; comprende e mensahe, si e oferta ta zona irealistico y no a bin di un fuente confiabel, cu ta haci promesanan pa haya placa facil sin gana of traha p’e, hopi sigur ta pasobra e ta falso.
