Prome Minister a reuni cu Embahadora di Reino Hulandes na Caracas

Apesar cu ainda no a forma un gobierno nobo na Aruba, Prome Minister ta sigui atende reunionnan cu ta di importancia pa Aruba. E relacion entre Aruba y Venezuela ta uno importante, pero debi na e crisis humanitario, violacion di derecho humano y e crisis politico cu tin na Venezuela, e relacion entre e dos paisnan ta bou presion.

Frontera cera

Durante e reunion a delibera riba e frontera cu ainda ta cera. E frontera ta cera pa diferente motibo y departamentonan di pais Aruba ta trahando nan conseho riba esaki. Prome Minister ta comprometi pa traslada tur informacion relaciona cu e decision pa tene e frontera cu Venezuela cera, na e gobierno nobo.

Decision di Gobierno di Merca

Otro punto di discucion tabata e situacion cu Gobierno di Presidente Trump di Merca, entre otro e cancelacion di e licencia di Chevron pa opera na Venezuela y su posibel impacto pa Aruba.

Tambe a papia di e relacion comercial entre Venezuela y Aruba. Embahadora Gonsalves a indica cu na Venezuela tin hopi interes entre personanan cu kier bin Aruba y esey ta algo pa Aruba tene cuenta cu ne.

Na final di e reunion Prome Minister a regala e Embahadora e sjaal cu un diseño di e mata di kibrahacha y a splica cu esaki ta un mata hopi fuerte y e ta regala e sjaal aki na hende muhenan fuerte reconociendo e forsa di e Kibrahacha den nan.

Di su parti e Embahadora e gradici Prome Minister pa tur e añanan di cooperacion cu e Embahada y pa su rol den e Internationaal Feministisch beleid unda Prome Minister a tuma posicion fuerte riba nivel international pa tur hende muhe na Aruba y den Reino.