Prome Minister a reuni cu Consul General di Merca pa Aruba

Merca ta e pais cu ken Aruba tin e relacion mas importante pa loke ta nos desaroyo economico, nos turismo pero tambe pa siguridad. E Consul General a bishita Aruba pa e celebracion di Himno y Bandera y tawata presente na e recepion na honor di tur Consul na Aruba dia 17 di maart.

Durante e reunion a trata diferente tema pero e principal ta e tema di Migracion cu pa Merca ta un tema delicado y cu na Aruba ta sinti su efectonan di cerca. E situacion na Venezuela ta sigui delicado y Aruba su posicion geografico di apenas 38 km cerca di Venezuela y e impacto migratorio cu Venezuela tin riba Aruba ta algo cu semper a keda bin dilanti durante reunionnan cu Merca pa asina por maneha esaki na e miho manera posibel.

Durante e reunion tambe a papia riba oportunidadnan economico, enseñansa y siguridad. Aruba ta un partner importante pa Merca den mantene e region aki sigur. Aruba na varios ocasion ta intercepta contrabando entre otro di droga y arma den awanan di Aruba. Esaki ta yuda mantene nos region mas sigur evitando cu e contrabando ta yega e destino, por ehempel Merca. Tur esaki ta haci cu Aruba y Merca tin un relacion hopi estrecho y ta importante pa mantene esaki asina.