Prome Minister a entrega Relato Anual pa e di 7 aña consecutivo
ORANJESTAD - Dia 13 di maart Prome Minister demisionario Evelyn Wever-Croes a anuncia cu a publica e Relato Anual 2024 di Ministerio di Prome Minister. Esaki ta e di 7 aña consecutivo cu ta entrega nan Relato Anual.
E relato anual ta duna un bista general di e trabounan, iniciativa, logronan y compromisonan di e Gabinete su maneho. Segun Prome Minister, e Relato Anual 2024 ta como un traspaso na e pueblo di Aruba di tur locual e ta bin ta haciendo durante e ultimo 7 aña y mey.
E Relato Anual 2024 ta cuminsa cu un introduccion na unda Prome Minister ta resalta e resistencia y progreso di Aruba, enfatisando recuperacion economico, integridad y sostenibilidad. Tambe ta subraya e esfuerso pa transparencia, anti-corupcion y desaroyo social, y e compromiso pa mehora calidad di bida di nos comunidad.
E Ministerio di Prome Minister ta consisti di cuater cartera y cada un tin un rol fundamental den gobernacion di Aruba: Asuntonan General, Innovacion, Organisacion Gubernamental, y Infrastructura y Planificacion Teritorial.
- Asunto General: E capitulo aki ta hopi extenso y trata Acuerdo di Gobernacion, Reformanan, Relacion den Reino, tambe Relacionnan Exterior y e crisis den Sur America. Tambe e capitulo ta trata Wetgeving, DWJZ, Siguridad Nacional, Veiligheidshuis y Crisis Management Office. Otro paragraaf ta trata Ombudsman, Comunicacion y Comisionnan cu Prome Minister a crea por ehempel e actiecomité Hondenverordening y Comision Nacional di Autismo.
- Innovacion: Aki ta duna relato di Directie voor Innovatie, unda ta trata Futura y EduTech y e-Government.
- Organisacion Gubernamental: Aki ta papia di Departamento di Recurso Humano, Personeelslasten, Bureau Interne Diensten (BID), CENSO, MFA y Hulpbestuurskantoor.
- Infrastructura y Planificacion Teritorial, ta referi na Directie Infrastructuur en Planning (DIP), Dienst Landmeetkunde en Vastgoedregistratie (DLV) of Kadaster, Dienst Openbare Werken (DOW) y Dienst Technische Inspecties (DTI).
Den e Relato Anual 2024, e trabou, e desaroyonan y e esfuersonan di cada cartera ta presenta den cuater capitulo structura, y cada uno ta refleha e compromiso pa gobernacion transparente, progreso sostenibel, y mehoracion di bida pa pueblo Arubano.
E relato anual ta finalisa cu un bista riba 2025 (Vooruitblik 2025) na unda cu ta indica kico ta spera pa aña 2025.
Por lesa y download RA 2024 riba:
https://issuu.com/gabinetewevercroesaruba/docs/jaarverslag_2024_ministerie_van_algemene_zaken?fr=sNWE5YTYzNjI4OTI