Prome Minister a atende “Ministerial Round Table” na Nacionnan Uni

Commision on the Status of Women ta un conferencia cu ta tuma luga cada aña y ta conta cu lidernan, specialmente lidernan femenino, di varios pais cu ta elabora riba nan logronan riba derecho di hende muhe y mucha muhe.

Durante e Ministerial Round Table, cu ta un di e reunionnan mas importante di e conferencia, ministernan di cada pais ta hiba palabra y ta duna un update di kico nan ta haciendo en cuanto e tema di derechonan di hende muhe y mucha muhe. Prome Minister di Aruba, na su turno a splica cu Aruba ta pone hopi atencion y enfoke riba e posicion di hende muhe y mucha muhe. A traha un Gender Policy unda ta indica riba e posicion di hende muhe y mucha muhe y kico mester haci pa fortifica nan posicion y duna nan mas oportunidad. Esaki ta algo di gran importancia y por mira resultadonan positivo ya cu Aruba a avansa hopi pero ainda tin reto.

Ademas a elabora riba ‘gender-based violence’ cu ta violencia contra hende muhe simplemente pasobra e ta di e sexo femenino. A splica kico tur ta haciendo y cu tin algun ley cu mester atende cu nan, pero cu Gobierno hunto cu stakeholders y NGOs ta trahando duro pa por finalisa.

E ‘Commission on the Status of Women’ ta e principal organo intergubernamental mundial dedica exclusivamente na promove igualdad di genero, derecho y empoderamento di hende muhe, documentando e realidad di nan bida rond mundo y forma standardnan global riba esaki.

Ora ta papia di hende muhe, no ta papia solamente di violencia y obstaculonan. Mester enfoca tambe riba oportunidadnan cu por crea pa e hende muhe principalmente den e area di tecnologia. Esaki ta bin cu su reto- y riesgonan pero tin hopi oportunidad den e area ey pa hende muhenan y mucha muhenan, y Aruba ta bin ta haciendo esaki pa varios aña caba a traves di Futura.