Prome biaha cu Aruba su defensor di pueblo a participa na e Conferencia Anual di Ombudsman di Reino

Durante e conferencia aki, e Ombudsmannan, a dialoga tocante e desaroyonan mas importante pa Reino y relevante pa e trabao di Defensor di Pueblo. 

Dia 15 di januari, Vice Premier Xiomara Maduro a ricibi e Defensornan di Pueblo na Bestuurskantoor unda a dialoga riba varios punto importante di e trabou di un Defensor di Pueblo.

Prome Minister Evelyn Wever-Croes ta indica cu a trata di un echo historico, mirando cu ta pa prome biaha Aruba tin Ombudsman, un Defensor di Pueblo cu ta participa na e conferencia. Ademas Aruba tabata e anfitrion di e conferencia e aña aki.

Presente pa e conferencia tabata e Defensornan di Pueblo sra. Jurima Bryson di Aruba, sr. Keursly Concincion di Corsou, sr. Gwendolien Mossel di St. Maarten y e Ombudsman Nacional sr. Reinier van Zutphen.

Diamars 14 di januari parti mainta, Su Excelencia Gobernador di Aruba, sr. Alfonso Boekhoudt, a ricibi e Defensornan di Pueblo di Reino pa un audiencia na Cas Ceremonial di Gobernador. Anochi Universidad di Aruba a organisa un charla ‘De rol en betekenis van de Ombudsman’ na Kapel Maria Convent. Durante e anochi aki e Defensornan di Pueblo a presenta kico ta e trabao di un Defensor di Pueblo y a splica loke esaki por significa pa e ciudadano. Universidad di Aruba a organisa e charla aki mirando cu e trabao di un Defensor di Pueblo ta nobo pa Aruba y asina informa comunidad riba kico e servicio di un Defensor di Pueblo ta encera.