Cada aña, Inmigracion Aruba, ta confronta diferente caso caminda mayornan pa un of otro motibo no tin e documentonan necesario pa biaha cu un menor di edad, p’esey desde dos aña pasa e formulario di permiso ta obtenibel riba e pagina di Gobierno esta: cu por download facilmente prome cu biaha cu un menor di edad.

E procedura ta necesario, pasobra Aruba tin cu cumpli cu e reglanan internacional contra traficacion di hende (mensenhandel en mensensmokkel). Tambe, mester proteha e menor di edad di, por ehempel, secuestro.

Cada persona cu ta desea di biaha cu un menor di edad, tin cu yena e formulario “Toestemming reizen met minderjarig kind” (Permiso pa biaha cu un menor). Asina por demostra, ora di pasa control na Inmigracion, cu di berdad tin permiso pa biaha cu e menor di edad.

Unabes cu download e formulario, mester yena esaki completamente. Hunto cu e formulario, mester entrega e siguiente documentonan:

• Copia paspoort di esun cu ta duna permiso (mayor/voogd);
• Copia paspoort di acompañante;
• Copia paspoort di e menor di edad;
• Si ta aplicabel, copia di permiso valido;
• Si ta aplicabel, copia di gezag register;
• Copia di pasashi di regreso.

Banda di esakinan, ta posibel pa entrega e “geboorte akte” di e menor di edad, sinembargo esaki no ta necesario si cumpli cu e prome rekisitonan menciona. 
Mester hiba e formulario y tur otro documento na oficina principal di Inmigracion Aruba pa control y stempel.

Inmigracion Aruba ta haci un apelacion na cada mayor/persona pa tene cuenta cu e proceso aki por tuma tempo den e temporada druk di vakantie, pues ta urgi pa hiba e formulario y tur documento necesario, minimo 4 dia prome cu biaha. Di e forma aki, lo evita di haya contratiempo y/of perde vuelo.  

Por haya mas información den e beleidsinstructie adhunto. Inmigracion Aruba lo publica mas informacion den e dianan binidero.