SER a enfoca riba e importancia pa stimula empresariado responsabel y sostenibel na Aruba mirando e rol fundamental cu esaki ta trece pa sigui crece y diversifica economia di Aruba. Den 2023 un total di 1539 compania nobo a registra, un aumento di 12.8% compara cu 2022. (1364) Esaki ta duna un indicacion cu e clima empresarial na Aruba ta uno positivo.

E retonan cu SER a identifica ta e centralisacion di informacion y haci esaki mas accesibel pa empresarionan. Fortifica aun mas e posiblidad di ricibi financiamento como tambe un mecanismo financiero alternativo manera “Venture capital”, "Business angels” y “crowdfunding” pa start-ups.

Minister di Asunto Economico, Comunicacion y Desaroyo Sostenibel, Geoffrey Wever ta gradici SER pa e conseho “Verantwoord en duurzaam ondernemen op Aruba”, y lo uza esaki pa amplia y mehora e maneho cu lo contribui pa sigui traha riba mehoracion di e clima empresarial na
Aruba.