Presentacion Obra literario “Di Zuidstraat pa Klei” y mas di autor Denis Henriquez

Denis Henriquez, naci na Aruba, ta un autor conoci pa su obra literario skirbi na Papiamento, Ingles y Hulandes. El a gradua como ‘Theoretisch Fysicus’ na Universidad di Leiden na Hulanda y a traha na Aruba y na Hulanda como docente di fisica y di matematica.

Denis su pasion ta literatura. El a publica diferente obra literario, manera novela, poema, textonan pa teatro y pa guion cinematografico. E buki mas conoci di Denis Henriquez aki na Aruba ta e buki ‘Zuidstraat’, cual ta su novela di debut. El a publica entre otro ‘Zuidstraat’, ‘Delft Blues’, ‘De zomer van Alejandro Bulos’, ‘Het sterven van Rebecca Lopez Ikario’. 

‘Klei’ ta e novela nobo cu el a publica na 2023. 

Programa: 

Directora di BNA Astrid Britten, director di DCA Siegried Dumfries y Gestor cultural, Mirto Laclé ta ofrece un programa multifacetico pa presenta un obra literario di un di e autor mas grandi di Aruba, Denis Henriquez. Lo tin documentario, charla, presentacion  y musica.

Dr. Wim Rutgers lo duna un charla cu un recorido den e obranan literario di Denis Henriquez ‘di Zuidstraat pa Klei’. Drs. Mirto Laclé lo duna un presentacion relaciona cu e obranan literario. Drs. Denis Henriquez lo comparti su experiencia y inspiracion pa su obranan literario.

Maybelline Arends-Croes, docente di musica, lo ta presente cu su grupo di cantante, ex-Young Voices, pa interpreta y deleita publico cu algun cancion cu letra inspira pa Denis Henriquez. Pianista, Johnny Scharbaay lo acompaña e cantantenan y lo interpreta algun piesa musical durante e anochi. 

Entrada ta gratis. Pa mas informacion por tuma contacto cu Mirto Laclé na 7426274.