Presentacion exclusivo di e iniciativa di “Family Friendly Workplaces”
ORANJESTAD – Dia 3 di april, Minister di Asunto Social, Salud Publico, Cuido di Adulto Mayor y Maneho di Adiccion, Drs. Mervin Wyatt-Ras a ricibi un presentacion riba e iniciativa “Family Friendly Workplace” for di e partnernan internacional cu ta trahando hunto cu Comision Vision Pedagogico.
E comision ta ser presidi door di Departamento di Asunto Social y ta consisti di 5 organisacion cu ta traha diariamente riba sosten na mayor. Ta trata aki di Fundacion Pa Nos Muchanan, Fundacion Respeta Mi, Tienda di Educacion y Wit Gele Kruis Aruba.
E siman aki a tuma luga un serie di workshop di tres dia diseña pa colecta informacion for di tanto sector priva, gubernamental, no-gubernamental y sindicato. E iniciativa aki ta un testimonio di e poder di colaboracion. Tur sector ta compronde cu mayornan tin hopi responsabilidad y cu tin un desafio grandi pa balansa e bida di trabao y esun di famia.
Danki na e sosten financiero di Nationale Postcode Loterij di Hulanda, Aruba ta conta cu sosten tecnico di un ekipo di experto di renombre mundial manera, sra. Ytske van Winden di UNICEF Hulanda, sra. Laurie Markle, sra. Ana Pro y sra. dr. Jenny Doubt di Parenting for Lifelong Health y sra. Fatmah Alkaabi cu ta lider di e proyecto “Parent-Friendly Label program” na Abu Dhabi.
Aruba ta conta cu un bon sosten tecnico disponibel pa haci e iniciativa aki un realidad. Un proyecto asina lo tin un impacto grandi pa e famianan y e comunidad en general di Aruba.