Por cuminsa paga impuesto di vehiculo di motor di 2025

Di e forma aki DIMP ta permiti e contribuyente haci e pago mas trempan, dunando mas espacio financiero pa por cumpli cu nan deber fiscal. E automobilista por scoge pa paga su impuesto di vehiculo di motor den un solo biaha of den mas biaha haciendo uzo di e servicio di pago parcial.  

E tarifa di impuesto di vehiculo di motor pa 2025 ta keda mescos cu e añanan anterior.  
Pa 2025 lo tin plach’i number nobo cu ta valido pa 5 aña, te cu 2029. Pa cada vehiculo di motor cu no ta brommer, DIMP ta otorga 2 plachi di number grandi. No lo otorga e plachinan chikito mas manera den pasado. Cada vehiculo lo tin e dos plachinan grandi solamente. E costo di e plachinan grandi ta Afl. 14,00 mientras cu e plachi chikito pa brommer ta Afl. 10,00
Na momento di haci pago di impuesto, mester paga Afl. 14 of Afl. 10 extra pa por ricibi e plachinan nobo.  

Pa por facilita e contribuyentenan mas tanto posibel, DIMP ta brinda e servicio di pago parcial. Cu e servicio aki e contribuyentenan por paga e impuesto di vehiculo di motor adelanta y den pida pida. Na e momento aki e contribuyente lo tin 5 luna di tempo prome cu e fecha final di 31 di januari 2025 yega. Haciendo uzo di e servicio di pago parcial, e contribuyente por parti e peso financiero durante e lunanan venidero. Esaki ta beneficioso pa por ehempel e contribuyente cu ta den dificultad financiero of cu tin mas cu un auto. Pa e empresanan cu tin hopi auto, esaki ta un bon oportunidad tambe pa haci uzo di e servicio di pago parcial.

E condicionnan pa e servicio di pago parcial ta lo siguiente: 

• Ta paga e impuesto delanta, esta prome cu dia 31 di januari 2025.  
• Ta haci e pago pa luna. 
• Ta paga e suma minimo rekeri sea Afl. 50 of Afl. 200 (depende e categoria di plachi). 
• No por paga menos cu Afl. 50 a menos cu e debe (restante) ta menos. 
• Ta haci e ultimo pago no mas laat cu dia 31 di januari 2025.  

E servicio di pago parcial ta valido unicamente pa pago di impuesto di vehiculo di motor.

Pago minimo ta depende e categoria di plachi 
E pago minimo pa luna ta depende den cua categoria di plachi e vehiculo ta registra. Aki ta sigui un skema.

DIMP ta recomenda su contribuyentenan pa paga via e sistema di Online Banking di 
Aruba Bank, Banco di Caribe of CMB, uzando e metodo di “Bill Payment”.  

Pa por procesa e pagonan online debidamente, ta importante pa inclui e siguiente informacion: 

1. Persoonsnummer na cual e vehiculo ta registra. 
2. Number di auto. 
3. E periodo di cuenta cu ta pagando (por ehempel: jan-jun 2025). 

Pa esnan cu ta haci uzo di e servicio di pago parcial y ta haci pago via banco: por pidi e recibo online despues di completa e ultimo pago di e impuesto. Por acudi tambe na e oficina principal na Camacuri, e MFA-nan of edificio di Post Aruba na San Nicolas pa haci pago di impuesto di vehiculo di motor.

Dia 31 di januari 2025 ta e ultimo dia cu por paga e impuesto di e prome mita di 2025. Pa e vehiculonan cu ta cay den e categorianan MFA, MFV y Plachi di nomber, mester paga e impuesto di aña 2025 completo pa dia 31 di januari 2025. Despues di 31 di januari 2025 no ta posibel mas pa paga e impuesto di e prome mita di aña 2025 den pida pida.

E contribuyente cu tin debe di impuesto di vehiculo di motor atrasa, no por paga e impuesto di 2025 tanten cu no a caba di paga e debe atrasa. E contribuyentenan aki por paga e debe den un solo biaha of por haci un areglo di pago pa e debe te cu aña 2024. E areglo di pago ta encera un termino maximo di pago di 3 luna. Pues, mester paga e debe atrasa den 3 pago. Pa por paga e impuesto di 2025, e contribuyente mester paga por lo menos un termino di pago riba su debe atrasa.  

No warda te ora e fecha final di 31 di januari 2025 ta cerca pa cumpli cu e pago di impuesto. E contribuyente lo haya un boet di 50% pa incumplimento den caso cu no haci pago of haci e pago laat. Haci pago di impuesto den un solo biaha of den varios biaha na tempo y evita gastonan innecesario.