Polis lo sigui controla riba benta di alcohol
ORANJESTAD - Recientemente Polis di Districto Santa Cruz a cuminsa cu varios control entre otro VAPE, pero tambe a dirigi e control riba benta di alcohol na personanan bao di e edad permiti.
A haya varios informacion y a tuma nota cu algun supermercado no ta cumpli cu e ley di benta di alcohol.
Durante control na diferente supermercado a tuma nota cu e alcohol no ta poni na nan lugar destina pa cual polis a duna e doño di e supermercadonan aki un prome aviso.
Cuerpo Policial ta urgi tur supermercado pa controla e orario stipula riba e permiso di benta di alcohol. Mas laat cu ta permiti bende alcohol den supermercado ta 9’or di anochi. Ademas e permiso ta stipula cu tur alcohol mester ta poni den un espacio separa den e supermercado.
Ta prohibi pa pone alcohol hunto cu otro producto manera: keshi, refresco, fruta etc..
KPA ta manda un mensahe di conscientisacion na tur supermercado pa preveni un boet halto indesea y ta sigura cu Polis lo controla na un manera inespera den tur supermercado!