Planta sewage treatment plant (STP) na Parkietenbos ta reanuda operacion
ORANJESTAD – E planta di procesa awa (Sewage Treatment Plant) na Parkietenbos. a reanuda su operacion riba 25 di november.
Pa falta di mantencion di e facilidad, esaki no por a procesa e desperdicio cu tabata yega. Pa e motibo aki a cera e planta na maart 2024.
Gobierno, mirando e necesidad grandi pa pone e planta aki den funcion, a tuma e decision di privatisa e planta y pone den man di un compania cu tin e capacidad pa inverti y drecha e planta. E ley di privatisacion a pasa den parlamento y a traspasa e propiedadnan pa Aruba Wastewater Sustainable Solutions (AWSS) cu lo encarga nan mes di haci inversionnan necesario.
Prome Minister Evelyn Wever-Croes a indica cu esaki sigur ta un dia importante, mirando cu pa esnan cu ta hiba e awa, specialmente e trucknan di septic tank, esaki ta un alivio grandi ya cu nan no mester bay te Zeewijk mas pa haci esaki. Cu e planta aki habri, e trucknan di septic tank por hiba e sushi na e planta completamente gratis y haya un servicio ta optimal. Cu e machinnan den funcion atrobe, por procesa e sushi sin causa molester.
