Oportunidad pa negoshi Arubiano explora mercado internacional ta mas cerca cu bo ta pensa

Departamento di Asunto Economico, Comercio y Industria (DEACI), a traves di su unidad Exprodesk, a organisa hunto cu e oficina di Representacion di Hulanda na Aruba (VNO) e evento comercial aki pa duna informacion valioso tocante apoyo cu e organisacion Hulandes Rijksdienst voor Ondernemend Nederland (RVO) ta ofrece na empresarionan den Reino Hulandes. 

E evento a conta cu presencia di Sra. Soelan Daal, International Business Advisor di RVO, kende a duna claridad riba e diferente tipo di asistencia cu RVO por ofrece na empresarionan Arubiano cu ta exporta, of cu tin ambicion pa exporta. RVO ta ofrece, entre otro, subsidio, voucher pa atende mision comercial, desaroyo di producto, y hasta sosten strategico cu por yuda cu exportacion. Despues di e charla, a tene un recepcion pa ‘network’ caminda a duna espacio pa conecta y intercambia di idea cu e experto of demas coleganan di Departamento di Asunto economico. 

Segun Minister di Finansa y Asunto Economico Geoffrey Wever, Aruba mester sigui busca forma pa amplia su posibilidadnan pa export y innovacion. “Nos ta den un momento clave pa traha relacion strategico cu partnernan for di Hulanda y di region. E instrumento cu RVO tin por ta practico pa yuda nos empresarionan local drenta den mercado internacional.” 

Ministerio di Finansa, Asunto Economico y Sector Primario ta encurasha tur empresario pa explora e posibilidadnan disponibel y no laga nan mes limita pa falta di informacion. E presentacion di RVO ta obtenibel via di Exprodesk y pronto lo ta obtenibel online. 

Ministro di Finansa, Asunto Economico y Sector Primario, Geoffrey Wever ta gradici Sra. Soelan Daal pa su presentacion, Sr. Vincent Storimans di VNO, un partner importante pa gobierno di Aruba y Sra. Maria Dijkhof-Pita, Sra. Sharon Meijer y Sr. Giacomo Pais di Departamento di Asunto Economico pa a organisa un evento aki.