Oportunidad pa aplica pa huisartsenopleiding na Aruba
ORANJESTAD - Recientemente, Dokter Joel Rajnherc, Director di ImSan, a anuncia cu e prestigioso “Huisartsenopleiding Aruba” cu ta acredita pa Amsterdam UMC, lo ta buscando candidatonan entusiasma pa e specialisacion di dokter di cas.
Esnan cu a completa nan estudio na Hulanda of cierto universidadnan den region, cu tin un titulo di “Master Degree” y cu ta cualifica pa tin un registracion di BIG of AruBIG, por aplica.
E estudio ta cuminsa dia 1 di augustus 2024 como AIOS (Arts in Opleiding tot Specialist) y candidatonan ta specialisa nan mes durante 3 aña pa bira dokter di cas aki na Aruba. E Huisartsenopleiding Aruba a cuminsa na 2009 cu e meta di reforsa e “eerstelijnszorg’ aki naAruba.
E opleiding ta organisa door di Huisartsenopleiding Amsterdam UMC hunto cu Departamento di Salud Publico di Aruba (DVG) y Huisartsen Vereniging Aruba (HAVA). E estudio ta tuma luga na nos hospital “Instituto Medico San Nicolas” (ImSan).
Minister di Turismo y Salud Publico, sr. Dangui Oduber ta invita canditatonan cu ta bin na remarke, pa aplica pa e opleiding pa por specialisa y bira dokter di cas na Aruba.
