No tin motibo di preocupacion na Aruba pa Human Metapneumovirus
ORANJESTAD – Durante di e ultimo dianan, medianan internacional a cuminsa raporta riba un posibel virus nobo cu ta circulando na China, cu ta hiba e nomber di Human Metapneumovirus (hMPV). HMPV no ta un virus nobo y ta circulando rond mundo desde 2000.
Na Aruba pa medio di nos sistema di vigilancia riba malesanan infeccioso respiratorio, Departamento di Salud Publico (DVG) continuamente ta monitor virusnan circulando riba nos isla manera Influenza A, Influenza B, RSV, Parainfluenza, Adenovirus, Rhino virus,COVID-19 y tambe hMPV. Depende di e temporada di aña, bo por haya un aumento den caso nan di infeccion respiratorio causa door di un di e virus nan ariba menciona
Na e momentonan aki (DVG) pa medio di datonan epidemiologico colecta, ta di opinion cu no tin motibo pa panico den comunidad tampoco pa introduci medidanan pa cu e virus di hMPV. Den 2024, un total di 46 muestra (2.3% di 2032 muestra) a test positief pa hMPV.
E conseho cu DVG ta duna y ta enfatisa riba dje ta pa ta consciente y proteha bo mes y otronan di tur tipo di virus of bacteria door di mantene un higiena di man optimal. Laba man principalmente prome cu come y evita mishi cu boca, wowo y nanishi cu man no laba y tambe evita contacto cu hende cu tin sintoma respiratorio. Si bo ta experencia sintomanan respiratorio, keda bo cas; evita di bay den hende (publico). Proteha bo mes y esnan vulnerabel (adulto mayor, esnan na estado, recien naci y esnan cu un sistema inmunologico comprimi of malesa cronico)
DVG lo sigui monitor menasanan pa cu salud publico internacional, regional y local pa por keda informa comunidad debidamente.
Pa mas informacion like Directie Volksgezondheid DVG Aruba riba Facebook, Follow DVG riba Instagram directie_volksgezondheid_aruba, bishita www.dvg.aw, yama 5224200 of manda bo e-mail na servicio@dvg.aw.
