Nathalie Maduro elegi como e prome Presidente di Dutch Caribbean Agriculture, Livestock, and Fisheries Alliance (DCALFA)

E nombramento aki ta un paso historico pa e sector di agricultura, cria y pesca den Caribe Hulandes, y un gran reconocemento di e liderasgo di señora Maduro.

DCALFA ta un plataforma di cooperacion cu ta uni Boneiro, Corsou, Sint Eustatius, Saba, Sint Maarten y Aruba, cu ta enfoca riba siguridad di alimentacion, sostenibilidad y desaroyo economico. E iniciativa DCALFA a cuminsa den maart di 2022 bou di e nomber "Dutch Caribbean Visioning Process (DCVP)", cu sosten di Netherlands Enterprise Agency (RVO) y Ministerio di Agricultura, Pesca, Siguridad Alimentario y Naturalesa (LVVN). E meta ta pa fortalece cooperacion entre e islanan, crea un plataforma pa formula un plan strategico cu ta garantisa siguridad di alimentacion y stimula crecemento economico pa cada isla.

Bou di e liderasgo di señora Maduro, DCALFA lo enfoca riba proyecto di sostenibilidad y educacion, promove agricultura den scolnan y stimula consumo local.

"Futuro di nos industria ta depende di e siguiente generacion di agricultor, piscado y entrepeneurnan. Nos ta dedica na crea oportunidadnan pa hoben participa, sea via educacion, training of iniciativanan innovativo" Señora Maduro a enfatisa.

Cu Señora Maduro na e mando, DCALFA ta cla pa guia e region na un era nobo di excelencia den agricultura y pesca.