Ministerio di Cultura ta invita pueblo pa celebra Dia di Betico
ORANJESTAD - Dia 25 di januari nos ta celebra Dia di Betico na ocasion di e fecha natalicio di Aruba su Libertador, gran estadista, politico y maestro sr. Gilberto Françios 'Betico' Croes.
Riba e fecha aki lo tin diferente actividad rond di Aruba, y manera custumber riba 24 y 25 di januari na Plasa Libertador G.F. Betico Croes ta rindi homenahe na Betico Croes.
Manifestacion Cultural riba Plasa Betico
Dia 24 di januari lo tuma luga e Manifestacion Cultural cu lo cuminsa pa 6 or di atardi cu presentacion di Caha di Orgel, feria culinario, cos dushi y artesania. Pa 8 or di anochi e programa oficial ta inicia cu Himno di Aruba, sigui pa discurso di Minister Maduro di Cultura. E programa lo sigui cu show di canto, baile, musica. E presentacion di e hobennan di Tipico Colegio Arubano y despues un concierto presenta pa un orkesta, bao encargo di e maestro Dwight Leonetta, cu lo acompaña varios di nos artistanan local cu lo interpreta cancionnan dedica na Betico Croes.
Dia 25 di januari riba Dia di Betico, Pueblo ta keda invita pa e Acto Protocolar riba Plasa Betico na unda cu Minister President Wever-Croes lo hiba un discurso. E mainta ta cuminsa 9or cu canto, poesia y baile di nos muchanan dedica na e lider stima Betico Croes. Ademas lo tin e acto di ofrenda floral na estatua di nos Libertador.
Minister di Finansa y Cultura Xiomara Maduro ta invita henter nos comunidad pa acudi riba 24 y 25 di januari na Plasa Beticio Croes.
Betico a stima Aruba y a dedica gran parti di su bida ta lucha na bienestar di e Pueblo di Aruba. Ban duna Betico su honor mereci, ban celebra su legado.