A reuni cu inversionistanan riba e mercado internacional di capital, den preparacion pa emision di bono internacional di Aruba, pa por refinancia e debe di Aruba cu ta madura den 2024. Den e reunion aki, Minister Maduro a haya asistencia tecnico di institutonan financiero internacional Santander y Citi.

E mandatario a reuni cu 12 inversionista institucional den 5 diferente cuidad na Merca, den cual ta figura companianan di seguro, fondonan di inversion, fondonan di pensioen y companianan cu ta maneha capital grandi. Nan tur ta inversionista grandi y conoci riba e mercado internacional di capital cu a mustra hopi interes pa inverti den bononan internacional di Aruba.

Minister Maduro y su ekipo a percura pa duna un presentacion amplio di e ultimo desaroyo economico y financiero di Aruba, den cual a brinda informacion di e recuperacion economico y financiero, e maneho di debe, e reformanan cu ta tumando luga den cuadro di e Landspakket, e plan di Aruba pa atende cu retonan financiero di cambio climatico, informacion riba e inversionnan cu ta tuma luga y ta duna bista riba e rendimento financiero di e companianan estatal di Aruba.

E emision cu Aruba lo haci proximamente no ta pa crece debe, sino pa refinancia esaki. E debe di Aruba mes lo bolbe baha den 2024, ya cu e placa di e surplus den presupuesto 2024 tambe ta bay pa paga e debe di nos Pais.

E inversionistanan a mustra interes pa e emision y awo lo sigui pa e proximo paso, cu ta haya autorisacion di Conseho di Minister di Reino basa riba articulo 29 di Statuut di Reino Hulandes, pa asina por inicia e transaccionnan.