Metodo nobo pa entrega di Manpower Planning 2025

E Manpower Planning tin su base legal den e Ordenansa Laboral 2013 (Arbeidsverordening 2013, AB 2013 no.14) cual ta vigente desde 1 di april 2013. Un dunado di trabou tin e obligacion, a base di articulo 30 punto 1 di e Ordenansa, pa manda un Registro di Personal riba peticion di e Director di e Departamento di Labor & Investigacion (Directie Arbeid & Onderzoek, DAO). E Registro di Personal ta consisti di tres parti, esta Modelo 1A den cual ta indica e personal cu tabata den servicio e aña anterior; Modelo 1B den cual ta indica e necesidad di personal pa e aña venidero den un empresa; y Modelo 1C den cual ta indica e necesidad di personal en conexion cu un proyecto specifico pa e aña venidero.

Metodo nobo

Desde aña pasa a introduci un metodo nobo pa entrega di e documentonan aki na DAO. E metodo nobo ta encera cu e compania, via un portal cu su mesun datonan di login, ta haya acceso na e database LABORA di DAO pa yena/entrega e datonan di e Registro di Personal y e Manpower Planning. Asina e compania por mira su datonan laboral na cualkier momento. 

Si bo ta desea di participa na e metodo nobo aki, por manda un email pa sr. Simon Brete (simon.brete@aruba.gov.aw).

Fecha di Entrega di Manpower Planning 2025

DAO ta haci un peticion pa entrega e Manpower Planning pa 2025 di bo compañía o e necesidad di personal en conexion cu un proyecto specifico pa 2025. E entrega di e Manpower Planning ta cuminsa dia 4 di december 2024. Tene cuenta cu esaki!

Publicacion di Manpower Planning riba website di DAO

Lo  analisa y publica di forma anonimo e Manpower Planning colecta di companianan te cu 31 di januari 2025 y na e nivel macro den e prome siman di februari 2025. E analisis ta concentra riba e tendencianan y conocimentonan necesario pa cu e sectornan y funcionnan di e necesidad di personal indica. E resultadonan di e analisis aki lo wordo publica riba e website di DAO (www.daoaruba.com) y ta contribui na un mihor comprondemento di e dinamica di e personal riba e mercado laboral y ta sostene e planificacion strategico como tambe desaroyo di maneho.

E resultado di e Manpower Planning indica te cu 30 di juni 2025 lo wordo publica den e di tres siman di juli 2025 riba e website di DAO (www.daoaruba.com).

E Manpower Planning por wordo entrega na DAO solamente den forma digital (via e database di LABORA of por medio di un Excel sheet na e email dao.labora@aruba.gov.aw).

Si tin necesidadnan nobo, of cambionan of adicionnan riba e Manpower Planning (e necesidad di personal) indica di bo compania durante e aña 2025, bo por comunica esaki na DAO na cualkier momento durante e aña.

Pa e dunadonan di trabou cu ainda no tin acceso na e portal di LABORA, nan mester manda nan Manpower Planning  mediante un Excel sheet. Desde 2 di december 2025, lo por download e Excel sheet for di e website www.daoaruba.com of www.gobierno.aw (Excel sheet:DAO Personeelsbehoefte 2025) of bo por pidi esaki via email na aanvraagpr@gmail.com, y DAO lo mand’é pa bo via email.

Si e compania  ta manda e Manpower Planning via e Excel sheet (segun Modelo 1B y/of Modelo 1C), ta ser pidi pa yena tur e datonan den e version digital di e formularionan y mand’é pa e email arbeidsmarktaruba@gmail.com.

Den caso cu bo compania tin un of mas sucursal, DAO ta haci un peticion pa yena e Registro di Personal no solamente pa e oficina principal (hoofdvestiging) (p.e. KvK-nummer 5555.0) pero tambe pa cada sucursal (p.e. KvK-nummer 5555.1, 5555.2 etc.). 

DAO ta recorda cu ta obligatorio pa manda e Manpower Planning entrante 4 di december 2024 (si tin un necesidad di personal den bo compania).

Fecha di entrega di Registro di Personal 2024 

E entrega di e Registro di Personal 2024 (Personeelsregister) 2024 cu e datonan di e personal den aña 2024 (Modelo 1A) ta tuma lugar na un momento mas despues, esta den e periodo di 1 di februari 2025 te cu 15 di maart 2025.

Pa companianan cu ta haci uzo di un intermediario (p.e. accountings- of adviesbureau) DAO kier recorda cu cumplimento di nos leynan laboral ta un obligacion di e dunado di trabou y no di e intermediario.

Si tin pregunta, por tuma contacto cu sr. Simon Brete na number di telefon 5237718 of via email simon.brete@aruba.gov.aw of cu sra.Louisetty Croes na number di telefon 5237722 of via email louisetty.croes@aruba.gov.aw.

 E datonan di trabou ta referi na e datonan di e compania, e datonan di e trahadonan, e necesidad di personal y e proyectonanen conexion cu esaki , tambe e lista di trabou, e trahadornan cu ta disponibel pa e compania (e trahadornan temporario), e terminacion di contract di e trahadornan y e datonan tocante trahadornan cu tin un permiso laboral.