Lansamento proyecto Boekstart
ORANJESTAD - Boekstart ta presenta un maletin nobo pa baby cu bukinan nobo y informacion actualisa.
BoekStart ta un programa cu tin como meta pa promove lesamento cu muchanan di 0-4 aña y pa permiti mayornan cu yiunan chikito disfruta di buki hunto. Biblionef, e instancia Hulandes cu ta e motor tras di e proyecto aki a traha un tour cu yama "Hallo Baby!" cu lo pasa riba e islanan di Caribe Hulandes pa promove esaki. E tour a start na Sint Maarten, Saba y Statia, pasa Boneiro y Corsou y lo finalisa na Aruba.
Escritora y ilustradora di buki pa mucha, Mylo Freeman a skirbi e buki “Hallo Baby!’ y ta presenta e lansamento di e proyecto. Esaki ta tuma lugar den Seccion hubenil di Biblioteca Nacional Aruba, dialuna 10 di februari di 10or di mainta pa 12or di merdia.
Biblioteca ta invita tur mayor na Aruba pa bin cu nan baby di 0 pa 2 aña pa e presentacion special aki.
Mylo Freeman lo ta na Aruba pa promociona e proyecto Boekstart na Aruba pa un siman largo. Durante di e siman di 10 pa dia 14 di februari 2025, Mylo lo bishita diferente scol di peuter y creche pa conta storia y ta duna workshop na biblioteca.
Den e maletin di Boekstart tin buki di Mylo Freeman na Hulandes y traduci na Papiamento y Ingles como tambe un buki di paña, special pa e chikitin. Presentacion di ‘Hallo baby’ ta un di e actividadnan cu ta dirigi riba promocion di lesamento cerca baby y nan mayor. Lesa den idioma materno ta hopi importante pa e desaroyo di idioma. Pa e presentacion aki Mylo Freeman lo haci uso di un Kamishibai pa conta storia. E ta duna mayor tips y conseho con pa lesa hunto cu nan baby y con pa encurasha nan yiu pa lesa. Na final tur baby lo ricibi e maletin cu buki como regalo y na mes momento e mayor por haci uzo di e oportunidad pa registra e baby pa bira miembro di biblioteca.
Esaki ta un proyecto special di Boekstart y Biblionef, subsidia pa Nederlands Letterenfonds. Por registra pa esaki cerca Gina na telefon 528 1504 of door di manda un email na curso@bna.aw.