Invitacion pa presentacion online di logistica entre Surinam y Aruba
ORANJESTAD - Despues di e mision comercial exitoso recien na Surinam, Minister di Asunto Economico, Comunicacion y Desaroyo Sostenibel Geoffrey Wever conhuntamente cu VSH United, Port Operator na Surinam, lo duna un presentacion online diabierna 12 di juli 2024 pa 9or di mainta pa tur comerciante local interesa den importa productonan for di Surinam.
Sr. Kushal Rambharos y Sr. Miguelito van Leeuwaarde di VSH United Surinam, lo elebora riba aspectonan di logistica y conexion entre Surinam y Aruba. Esaki ta un follow up riba e bishita recien na e Port di Surinam, dirigi na nos empresarionan cu kier importa producto di Surinam pa Aruba.
Durante e mision recien na Surinam, a sinta cu dos compania di logistica y a bishita e waf unda a sinta cu representantenan di VSH Holding y a ricibi splicacion amplio di e proceso di "load" (consolida y no consolida), "unload" y "clear" containers na Surinam.
Na e encuentro na Port of Surinam, a acorda cu tur e stakeholders relaciona cu importacion di producto for di Surinam cu lo haci e presentacion aki, pa asina duna miho guia y asistencia na e empresarionan. Surinam ta brinda diferente oportunidad comercial, y cu e conocemento adicional aki, kier facilita e proceso y empodera e comerciantenan local pa haci e miho uzo di e oportunidad cu Surinam ta ofrece.
Minister Geoffrey Wever kier a gradici Departamento di Asunto Economico, Comercio y Industria (DAECI) como tambe VSH United pa a haci esaki posibel y ta invita tur comerciante cu ta interesa pa asisti na e presentacion online pa registra. Pa mas informacion of registracion, por tuma contacto cu DAECI su unidad ARINA, na z.quant@deaci.aw.