Inspeccion di Enseñansa
Inspeccion ta e organo di control y di conseho pa Ministro di Enseñansa. Control riba enseñansa ta na encargo di Minister di Enseñansa. Seccion di Inspeccion ta consisti di inspectornan pa enseñansa primario, enseñansa general avansa y enseñansa profesional. Apesar cu tin diferente tipo di enseñansa, e punto di salida di Inspeccion ta cu trabou di control di inspectornan ta riba un solo liña y cu mester haci’e segun e “Toezichtkader” (cuadro di control). Esaki ta nifica cu tur inspector por reemplasa otro.
Inspeccion tin como tareanan principal:
- Stimula scolnan pa traha na cuido di calidad;
- Raporta y duna conseho tocante e desaroyonan señala;
- Evalua calidad di enseñansa;
- Y vigila cumplimento di e reglanan legal cu ta regarda enseñansa.
Si nos wak e tereno amplio di trabou di Inspeccion, anto por categorisa e trabounan bou di e siguiente rubricanan: Administrativo, Huridico/Organisatorio, Habilidad di Enseñansa, Control, Evaluacion, Estimulo, Raporta, Conseho, Representativo, Consulta, Coordinacion, Promove Expertisio, Prepara Maneho y Intermedia.
Tipo di e trabounan di inspector ta trece cun’e cu mester por tin un bista riba un tereno amplio dentro di henter e proceso di enseñansa. Inspeccion tin control y evaluacion di enseñansa di cada scol tanto na nivel micro como macro. Ta trata aki di sucesonan na nivel di e alumno te na colabora pa prepara legislacion pa enseñansa den su totalidad cu e meta pa vigila e calidad y promove calidad di enseñansa.
Pa mas informacion por tuma contacto cu Departamento di Enseñansa, seccion Inspeccion di Enseñansa.