Inauguracion di Residencia Blenchi: Un Paso Importante pa vivienda pa adulto mayor na Aruba

E ceremonia a tuma luga dia 24 di mei 2024 na Boegoeroei 11-Z.

E necesidad pa vivienda accesibel y pagabel ta creciendo di manera acelera den nos comunidad, di cual un grupo grandi ta consisti di adulto mayor. Segun e informacion di FCCA, alrededor di 49% di persona riba nan lista di espera ta consisti di esnan mayor di 55 aña y 79% di e grupo aki ta pidi pa apartamento di 1 camber. Como cu e pr    oyecto ta trata di un renobacion di un Compleho di apartamento pa studiante, FCCA por a converti esaki relativamente lihe y na un costo rasonabel den 48 apartamento di un camber.

Esaki no ta e prome proyecto cu FCCA ta dedica na e grupo aki den nos comunidad, den 5 otro bario cual ta Savaneta, Cunucu Abou, Paradera (Santa Filomena), Avicena straat, y Jaburibari, a traha riba proyectonan similar. Residencia Blenchi no solamente ta ofrece e oportunidad pa engrandece e oferta di vivienda, pero tambe ta ekipa cu facilidadnan pa duna e habitantenan un estilo di bida trankil y agradabel.

Sra. Julie Wever, Director Tecnico & Comercial di FCCA, a expresa su gratitud na tur esnan cu a contribui na e exito di e proyecto. "No por logra e meta aki sin e esfuerso di tur ‘stakeholders’, manera contratista y su ekipo, y e empleadonan na FCCA. Boso ta e base di nos exito, y pa esaki, nos ta sumamente agradeci".

FCCA ta estableci na 1979, y ta ofrece servicionan financiero y di "real estate," manera financiamento hipotecario, benta di tereno y huur di propiedad. E mision di e fundacion ta pa desaroya y construi viviendanan accesibel, eficiente, y duradero pa atende e necesidad di casnan social den nos comunidad. Den e 45 añanan di nan existencia, a logra yuda mas cu 20.000 famia yega na nan propio cas.