IDEA ta organisa workshop Silver Entrepreneurship
ORANJESTAD - Departamento di Asunto Economico, Comercio y Industria mediante su unidad di Iniciativa pa Desaroyo pa Empresa Arubano (IDEA), ta organisado e workshop “Silver Entrepreneurship: for the retired or soon to be retired”.
E workshop aki ta pa pensionado of personanan cu ta casi yega e edad di pensioen (60+) y ta parti di e maneho di Ministerio di Asunto Economico pa stimula entrepreneurship.
Si acaso bo ta un pensionado, of dentro di corto plaso lo baha cu pensioen y bo kier sigui uza bo carera y experiencia di bida den bo mesun negoshi y ta pensando: ‘con pa cuminsa’ of ‘kico pa bay haci awo’ of si acaso bo ta bezig cu bo negoshi caba y kier sigui update bo mes cu tecnologia y innovacion, esaki ta bo oportunidad.
E topiconan cu lo presenta durante e 2 dianan di workshop ta:
- Social Media / Branding – lo siña con pa ‘brand’ nan producto of servicio riba media social;
- Artificial Intelligence (AI) – lo haya oportunidad pa explora e mundo di AI y sa con pa aplica esaki den nan negoshi;
- Cryptocurrency (Crypto) – lo haya un miho comprondemento tocante moneda digital manera Bitcoin y e tecnologia di deposito di data Blockchain;
- “Con nos ta para y con nos lo sigui?” – lo haya chens pa entre otro intercambia nan experiencia y duna conseho.
E workshop ta completamente gratis y lo tuma luga dia 9 y 10 di april proximo, entre 8:30 am pa 12:15 pm na Departamento di Asunto Economico, Comercio y Industria, situa na Sun Plaza, piso dos, sala # 25. Pa participa na e workshop bo mester ta yegando e edad di 60 aña of ta mas grandi, y mester registra via email: j.trim@deaci.aw. Cupo ta limita.
Pa mas informacion por yama IDEA na telefon: 521-2440 of 521-2400.
Abo tin un Idea? Bishita Idea na Departamento di Asunto Economico, Comercio y Industria, na Sun Plaza piso dos, y nan lo yudabo cu tur informacion y guia necesario.