Hurista di Departamento di Aviacion Civil ta ricibi su diploma di postgrado
ORANJESTAD - Recientemente Marjanne Jarzagaray-da Silva, juridisch beleidsmedewerker na Departamento di Aviacion Civil (DAC), a gradua y a ricibi su diploma di postgrado den Derecho Aeronautico.
Esaki a tuma luga den presencia di Minister di Transporte, Integridad, Naturalesa y Asunto di Adulto Mayor demisionario Ursell Arends, y director di DAC, ing. Edwin Kelly.
Marjanne Jarzagaray-da Silva a completa su estudio di derecho na 2012, na Universidad di Aruba, cu e profiel di privaatrecht. E mes un aña sra. Jarzagaray-da Silva a cuminsa su carera profesional na DAC como hurista. Durante e añanan cu a pasa sra. Jarzagaray-da Silva a logra completa diferente curso pa specialisa su mes den e ramo di aviacion.
Na 2022 Sra. Jarzagaray-da Silva a inicia su estudio di postgrado na Universidad Católica Argentina (UCA) den e ramo di Derecho Aeronautico. E estudio aki a tuma luga danki na un beca otorga na Aruba door di Comision Latinoamericana di Aviacion Civil (CLAC). Aruba ta pais miembro di CLAC pa hopi aña caba y un di e bentahanan grandi di e miembrecia aki ta e posibilidad pa obtene beca pa estudionan specialisa den ramo di aviacion.
Na december 2024 sra. Jarzagaray-da Silva a termina e estudio aki exitosamente cu un score di 9. Topico di su tesis ta “Incidentes de pasajeros rebeldes en la aviacion: una exploración integral de causas, impactos y estrategias de mitigación”. Sra. Jarzagaray-da Silva a entrega un copia di su tesis na Minister Ursell Arends.
Minister Arends, y director di DAC a felicita Sra. Jarazagaray-da Silva cu e logro importante aki y a gradici CLAC cu a otorga e beca pa por a haci e estudio importante aki.
Departamento di Aviacion Civil, y Aruba como pais, ta conta cu un hurista mas specialisa academicamente den Derecho Aeronautico, cu sigur ta un contribucion grandi pa aviacion na Aruba.
